ട്രിച്ചി: ട്രിച്ചി വിമാനത്താവളം വഴി കടത്താൻ ശ്രമിച്ച സ്വർണ നാരുകൾ (gold wires) പിടികൂടി. ട്രിച്ചി എയർപോർട്ടിലെ എയർ ഇന്റലിജൻസ് വിഭാഗമാണ് സ്വർണം പിടികൂടിയത്. വിപണിയിൽ ഇതിന് 12 ലക്ഷം രൂപ വിലമതിക്കുമെന്ന് അധികൃതർ അറിയിച്ചു. സ്വർണ നാരുകളുടെ 14 കെട്ടുകൾ കടത്താനുള്ള യാത്രക്കാരന്റെ ശ്രമമാണ് വിഫലമായത്. വ്യാഴാഴ്ചയായിരുന്നു സംഭവം.
ഇൻഡിഗോ വിമാനത്തിൽ ദുബായിൽ നിന്നും ട്രിച്ചിയിലേക്ക് യാത്രചെയ്തയാളിൽ നിന്നാണ് 250 ഗ്രാം വരുന്ന സ്വർണ നാരുകൾ കണ്ടെടുത്തത്. യാത്രക്കാരന്റെ കൈയ്യിലുണ്ടായിരുന്ന ഒരു തുണിയിലായിരുന്നു സ്വർണം ഒളിപ്പിച്ചിരുന്നത്. ആകെ 12,84,869 രൂപയുടെ സ്വർണ നാരുകളാണ് പിടികൂടിയതെന്ന് എയർ ഇന്റലിജൻസ് വിഭാഗം അറിയിച്ചു.
കഴിഞ്ഞ ദിവസം കരിപ്പൂർ വിമാനത്താവളം വഴി 100 പവൻ സ്വർണം കടത്താൻ ശ്രമിച്ച പയ്യോളി സ്വദേശി റസാഖ് പിടിയിലായിരുന്നു. സ്വർണം മിശ്രിത രൂപത്തിലാക്കി ശരീരത്തിനകത്ത് ഒളിപ്പിച്ച റസാഖിനെ വിമാനത്താവളത്തിന് പുറത്ത് വെച്ച് പോലീസാണ് പിടികൂടിയത്. 42 ലക്ഷം രൂപയുടെ സ്വർണമാണ് റസാഖ് കടത്താൻ ശ്രമിച്ചത്.
