ബ്രേക്ക്ഫാസ്റ്റ് അഥവാ പ്രഭാതഭക്ഷണം ബ്രയിൻ ഫുഡാണെന്ന് ആരോഗ്യവിദഗ്ധർ പറയുന്നത്. പ്രഭാതഭക്ഷണം ഒഴിവാക്കിയാൽ അത് ശരീരത്തിന്റെ അന്നത്തെ ദിവസത്തെ പ്രവർത്തനങ്ങളെ സാരമായി തന്നെ ബാധിക്കുമത്രേ. നമ്മൾ മലയാളികൾ അത്യാവശ്യം ഗംഭീരമായി തന്നെ പ്രഭാതഭക്ഷണം കഴിക്കുന്നവരാണ്. പുട്ടും കടലക്കറിയും, അപ്പവും മുട്ടക്കറിയും ദോശയും, സാമ്പാറും, ഉപ്പുമാവും എല്ലാം തീൻമേശയിൽ നിറയുന്നു. എന്നാൽ തിരക്കേറിയ ജീവിതത്തിൽ പലപ്പോഴും പ്രഭാതഭക്ഷണമായി മറ്റ് പല ഭക്ഷണവിഭവങ്ങളെയും ആശ്രയിക്കുന്ന ഒരു രീതിയിലേക്ക് നാം മാറിയിട്ടുണ്ട്. അതിലൊന്നാണ് ബ്രഡ് കഴിക്കുന്നത്. കഴിക്കാൻ എളുപ്പമായതിനാലും സമയം ലാഭിക്കുന്നതിനാലും സ്കൂൾ കുട്ടികൾ മുതൽ മുതിർന്നവർ വരെ ബ്രേക്ക് ‘ഫാസ്റ്റായി’ ബ്രഡ് കഴിച്ചിട്ടാണ് പോകുന്നത്.
എന്നാൽ ഇത് അത്ര നല്ല ശീലമല്ലെന്നാണ് ആരോഗ്യവിദഗ്ധർ ചൂണ്ടിക്കാണിക്കുന്നത്. വെറും വയറ്റിൽ ബ്രഡ് കഴിക്കുന്നത് പല പാർശ്വഫലങ്ങളും ഉണ്ടാക്കുമത്രേ. കാർബോഹൈഡ്രേറ്റുകൾ കൂടുതലുള്ള വലിയ ഊർജ്ജ സ്രോതസ്സാണ് ബ്രഡ് എന്നതിൽ തർക്കമില്ല. ബ്രഡ് വേഗത്തിൽ ഊർജ്ജമായി മാറുന്നു. എന്നാൽ ഇതിന് ഉയർന്ന കലോറി മാത്രമേ ഉള്ളൂ. പോഷകങ്ങൾ വളരെ കുറവാണ്. അതായത് വെറും വയറ്റിൽ പ്രഭാതഭക്ഷണമായി ബ്രഡിനെ പ്രോത്സാഹിപ്പിക്കാനാവില്ലെന്ന് സാരം.
ബ്രഡിന് ഉയർന്ന ഗ്ലൈസെമിക് സൂചികയുണ്ട്. ഇത് രക്തത്തിലെ പഞ്ചസാരയുടെ അളവ് പെട്ടന്ന് കൂടാൻ കാരണമാകും. ഇത് പിന്നീട് ടൈപ്പ് 2 പ്രമേഹത്തിന്റെ അപകടസാധ്യതയാണ് വർദ്ധിപ്പിക്കുന്നത്.ഉയർന്ന ഗ്ലൈസെമിക് സൂചിക ഉള്ളത് കൊണ്ട് തന്നെ ബ്രഡ് കഴിച്ചാൽ പെട്ടന്ന് വിശക്കും . ഇത് അമിതമായി ഭക്ഷണം കഴിച്ച് ശരീരഭാരം കൂടാൻ ഇടയാക്കും.
ബ്രഡിൽ സോഡിയത്തിന്റെ അളവ് വളരെ കൂടുതലാണ്. ഇത്തരം ഭക്ഷണം രാവിലെ വെറുംവയറ്റിൽ കഴിക്കുന്നത് വയറിന് ദോഷകരമാണ്. കാരണം ദഹിക്കാൻ പ്രയാസമാണ്. ഇത് വയർ വീർക്കലിന് കാരണമാകും. ബ്രഡിൽ അടങ്ങിയിരിക്കുന്ന കാർബോഹൈഡ്രേറ്റുകൾ മലവിസർജനത്തെ ദോഷകരമായി ബാധിക്കും. അതായത് പ്രഭാതഭക്ഷണമായി സ്ഥിരം ബ്രഡ് കഴിക്കുന്ന ശീലം ഒഴിവാക്കുന്നതാണ് നമ്മുടെ ആരോഗ്യത്തിന് നല്ലത്.
