ബംഗളൂരു: ഭാരത് ജോഡോ യാത്രയുടെ പ്രചാരണത്തിനായി കെജിഎഫിലെ ഗാനം അനുമതിയില്ലാതെ ഉപയോഗിച്ച കോൺഗ്രസിന് എട്ടിന്റെ പണി. പാർട്ടിയുടെ ട്വിറ്റർ അക്കൗണ്ടുകൾ ബ്ലോക്ക് ചെയ്യാൻ കോടതി ട്വിറ്ററിനോട് നിദ്ദേശിച്ചു. കെജിഎഫ് ചാപ്റ്റർ 2ലെ ഗാനമാണ് പ്രചാരണത്തിനായി കോൺഗ്രസ് ഉപയോഗിച്ചത്.
ബംഗളൂരു കോടതിയാണ് അക്കൗണ്ടുകൾ താത്കാലികമായി ബ്ലോക്ക് ചെയ്യാൻ ഉത്തരവിട്ടത്. പകർപ്പവകാശ ലംഘനം നടത്തിയെന്ന് ചൂണ്ടിക്കാട്ടിയായിരുന്നു ഉത്തരവ്. കേസ് അടുത്ത തവണ പരിഗണിക്കുന്നതുവരെ അക്കൗണ്ടുകൾക്ക് വിലക്ക് തുടരണമെന്നും നിർദ്ദേശമുണ്ട്.
എംആർടി മ്യൂസിക്കാണ് കോൺഗ്രസ് പകർപ്പവകാശ ലംഘനം നടത്തിയെന്ന് ചൂണ്ടിക്കാട്ടി പരാതി നൽകിയത്. അനുമതിയില്ലാതെയാണ് ചിത്രത്തിലെ ഗാനം ഉപയോഗിച്ചതെന്നും, ആഗോളതലത്തിൽ വലിയ പ്രശസ്തി നേടിയ ഗാനമാണ് സിനിമയിലേത് എന്നും ചൂണ്ടിക്കാട്ടി എംആർടി മ്യൂസിക് മാനേജർ എം നവീൻ കുമാർ ആണ് പരാതി നൽകിയത്.
ഇതിൽ കോൺഗ്രസ് നേതാക്കളായ രാഹുൽ ഗാന്ധി, ജയ്റാം രമേശ്, സുപ്രിയ ശ്രിനാതെ എന്നിവർക്കെതിരെ യശ്വന്ത്പൂർ പോലീസ് കേസ് എടുത്തിരുന്നു. പകർപ്പവകാശ നിയമം, ഐടി നിയമം, ഇന്ത്യൻ ശിക്ഷാ നിയമം എന്നിവയിലെ വിവിധ വകുപ്പുകൾ പ്രകാരമായിരുന്നു കേസ്.
