ന്യൂഡൽഹി: മുൻ ടെന്നീസ് താരം സാനിയ മിർസയും പാകിസ്താൻ ക്രിക്കറ്റ് താരം ഷൂഹൈബ് മാലികും വേർ പിരിയുന്നതായി അഭ്യൂഹം. അടുത്തിടെ സാനിയ മിർസ ഇൻസ്റ്റഗ്രാമിൽ പങ്കുവെച്ച പോസ്റ്റാണ് ഇരുവരും തമ്മിലുള്ള ബന്ധം അവസാനിപ്പിക്കാൻ ഒരുങ്ങുന്നതായുള്ള അഭ്യൂഹങ്ങൾക്ക് തുടക്കമിട്ടത്. 2010 ഏപ്രിലിലായിരുന്നു സാനിയയും ഷുഹെെബും വിവാഹിതരായത്. തമ്മിലുള്ള വിവാഹം.
കഴിഞ്ഞ ദിവസമായിരുന്നു സാനിയ മിർസ ഇൻസ്റ്റഗ്രാമിൽ പോസ്റ്റിട്ടത്. ‘എവിടെയാണ് തകർന്ന ഹൃദയങ്ങൾ പോകുക, അള്ളാഹുവിന്റെ അടുത്തേക്ക് ‘ എന്നായിരുന്നു സാനിയയുടെ ഇൻസ്റ്റഗ്രാം പോസ്റ്റ്. അറബിയിലും ഇംഗ്ലീഷിലുമായി പങ്കുവെച്ച പോസ്റ്റ് നിമിഷ നേരങ്ങൾ കൊണ്ടാണ് വലിയ ചർച്ചയായത്.
വിവാഹ ബന്ധം വേർപെടുത്താൻ പോകുകയാണെന്ന തരത്തിൽ നിരവധി പോസ്റ്റുകൾ സമൂഹമാദ്ധ്യമങ്ങളിൽ പ്രത്യക്ഷപ്പെടാൻ ആരംഭിച്ചു. സാനിയയ്‌ക്കെതിരെ പരിഹാസവും സമൂഹമാദ്ധ്യമങ്ങളിൽ ഉയർന്നിരുന്നു. ഇരുവരും തമ്മിൽ വേർപിരിയുമെന്ന വാർത്തകൾ അടിസ്ഥാനരഹിതമാണെന്ന് അറിയിച്ച് പാക് ക്രിക്കറ്റ് താരങ്ങൾ രംഗത്ത് എത്തിയിട്ടുണ്ട്. അതേസമയം വാർത്തകളോട് ഇതുവരെ താരങ്ങൾ പ്രതികരിച്ചിട്ടില്ല.
നീണ്ട 12 വർഷത്തെ ദാമ്പത്യത്തിനൊടുവിലാണ് ഇരുവരും തമ്മിൽ പിരിയുന്നതായുള്ള അഭ്യൂഹങ്ങൾ പുറത്തുവരുന്നത്. ഇരു രാജ്യങ്ങളിലെ കായിക താരങ്ങൾ തമ്മിലുള്ള വിവാഹം വലിയ ചർച്ചകൾക്കും വിവാദങ്ങൾക്കും വഴിവെച്ചിരുന്നു.
