ഇറ്റലിയിലെ മിലാനിൽ നടന്ന 2022 EICMA ഷോയിൽ റോയൽ എൻഫീൽഡ് ആരാധകർ ഏറെ കാത്തിരിക്കുന്ന മിഡിൽ വെയ്റ്റ് ക്രൂയിസർ ‘സൂപ്പർ മെറ്റിയർ 650’ ഔദ്യോഗികമായി അവതരിപ്പിച്ചു. ഇത് ഇന്റർസെപ്റ്റർ 650, കോണ്ടിനെന്റൽ ജിടി 650 എന്നിവയുടെ അതേ പ്ലാറ്റ്‌ഫോമിനെ അടിസ്ഥാനമാക്കിയുള്ളതാണ്. എന്നാൽ നിരവധി മാറ്റങ്ങളും സൂപ്പർ മെറ്റിയർ 650-യിൽ കാണാം. 2022 നവംബർ 18 മുതൽ 20 വരെ ഗോവയിൽ നടക്കുന്ന റോയൽ എൻഫീൽഡ് റൈഡർ മാനിയയിൽ വച്ച് സൂപ്പർ മെറ്റിയർ 650 ഇന്ത്യയിൽ അവതരിപ്പിക്കും. ഈ വർഷം അവസാനമോ, അടുത്ത വർഷം ആദ്യമോ ബുള്ളറ്റ് ഇന്ത്യൻ നിരത്തിൽ ഇറക്കിയേക്കും.
ആസ്ട്രൽ, സെലസ്റ്റിയൽ, ഇന്റർസെല്ലർ എന്നിങ്ങനെ മൂന്ന് വേരിയന്റുകളിലായാണ് സൂപ്പർ മെറ്റിയർ 650 എത്തുക. മെറ്റിയർ 350-യുടെ ‘ജെ’ പ്ലാറ്റ്‌ഫോമുമായി പങ്കിടുന്നു. പുതിയ റൗണ്ട് എൽഇഡി ഹെഡ്‌ലാമ്പ്, ടിയർഡ്രോപ്പ് ഫ്യുവൽ ടാങ്ക്, റെട്രോ ശൈലിയിലുള്ള ചിറകുള്ള ലോഗോ, വീതിയേറിയ ഹാൻഡിൽബാർ, പുതിയ സൈഡ് പാനലുകൾ, ഫോർവേഡ് സെറ്റ് ഫൂട്ട് പെഗുകൾ, പൂർണ്ണമായും പുതിയ ടെയിൽ സെക്ഷൻ എന്നിവ ബുള്ളറ്റിന് നൽകുന്നു. ഉയർന്ന വേരിയന്റുകളിൽ സിൽവർ ഫിനിഷ് അലോയ് ഘടകങ്ങളും താഴ്ന്ന വേരിയന്റുകൾക്ക് ബ്ലാക്ക്ഡ്-ഔട്ട് ട്രീറ്റ്‌മെന്റോടുകൂടിയ അലോയ് ലഭിക്കും.
ഇന്റർസെപ്റ്ററിന്റെയും കോണ്ടിനെന്റൽ ജിടിയുടെയും അതേ 648 സിസി, പാരലൽ-ട്വിൻ മോട്ടോർ തന്നെയാണ് സൂപ്പർ മെറ്റിയർ 650-യ്‌ക്കും. 46.2 ബിഎച്ച്പി കരുത്തും 52എൻഎം ടോർക്കും എഞ്ചിൻ ഉത്പാദിപ്പിക്കുന്നു. മുൻവശത്ത് 320 എംഎം ഡിസ്‌ക്കും പിന്നിൽ 300 എംഎം റോട്ടറുമാണ് ബ്രേക്കിംഗ് ചുമതലകൾ നിർവ്വഹിക്കുന്നത്. ബുള്ളറ്റിൽ സെമി-ഡിജിറ്റൽ ഇൻസ്ട്രുമെന്റ് ക്ലസ്റ്റർ സജ്ജീകരിച്ചിരിക്കുന്നു. ഇത് മെറ്റിയർ 350-ൽ ഉള്ള യൂണിറ്റിന് സമാനമാണ്. കൂടാതെ, RE-യുടെ ട്രിപ്പർ നാവിഗേഷൻ സംവിധാനവും ഉണ്ട്.
