അപകടമുണ്ടായെന്ന പേരിൽ കാറുടമയെ ഭീഷണിപ്പെടുത്തി പണം തട്ടിയെടുത്ത രണ്ടു പേരെ ബെംഗളൂരു പോലീസ് അറസ്റ്റ് ചെയ്തു . ബെംഗളൂരുവിലെ സിദ്ധപുരയിൽ ഒക്ടോബർ 26നു നടന്ന സംഭവത്തിൽ, സിസിടിവി ദൃശ്യങ്ങളുടെ അടിസ്ഥാനത്തിലാണ് ബൈക്ക് യാത്രക്കാരായ രണ്ടു പേരെ പിടികൂടിയത്. അപകടമുണ്ടായെന്ന പേരിൽ കാറുടമയെ ഭീഷണിപ്പെടുത്തി 15,000 രൂപയാണ് ഇവർ വാങ്ങിയത്.
അടുത്ത് കൂടി പോകുകയായിരുന്ന ബൈക്കിലെത്തിയ രണ്ട് പേർ കൈകൊണ്ട് ബോധപൂർവം ഇടിക്കുന്നത് സിസിടിവി ദൃശ്യങ്ങളിൽ വ്യക്തമാണ്. ഇതിനുശേഷം ബൈക്കിൽ കാറു തട്ടിയെന്നു പറഞ്ഞ് ഉടമയോട് പണം ആവശ്യപ്പെട്ടു . പോലീസിൽ പരാതി നൽകുമെന്ന് ഭീഷണിപ്പെടുത്തുകയും ചെയ്തു. തുടർന്ന് കാറുടമ ഇവർക്ക് 15,000 രൂപ നൽകി. എന്നാൽ സംഭവം മനപൂർവ്വം ബൈക്കിൽ വന്നവർ സൃഷ്ടിച്ചതാണെന്ന് സിസിടിവി ദൃശ്യങ്ങൾ പരിശോധിച്ചപ്പോഴാണ് വ്യക്തമായത്.
ഓഗസ്റ്റിൽ സമാന സംഭവത്തിൽ, പണം തട്ടിയതിന് രണ്ട് പേരെ ബസവനഗുഡി പോലീസ് അറസ്റ്റ് ചെയ്തിരുന്നു.
