ഇറ്റലിയിലെ മിലാനിൽ സമാപിച്ച EICMA 2022 ഷോയിൽ ഏറെ ശ്രദ്ധിക്കപ്പെട്ട ബ്രാൻഡുകളിലൊന്നാണ് ബെനെല്ലി. ഇറ്റാലിയൻ-ചൈനീസ് നിർമ്മാതാവ് മിലാനിൽ നടന്ന ഷോയിൽ തങ്ങളുടെ പുതിയ ക്വാർട്ടർ-ലിറ്റർ അഡ്വഞ്ചർ ബൈക്ക് അനാച്ഛാദനം ചെയ്തു. ബെനെല്ലി BKX 250 എന്നാണ് വാഹനത്തിന്റെ പേര്. മിനിമലിസ്റ്റിക് ശൈലിയിലുള്ള ചെറുതും ഭാരം കുറഞ്ഞതുമായ ബൈക്കാണിത്. 250 സിസി സിംഗിൾ-സിലിണ്ടർ ലിക്വിഡ് കൂൾഡ് എഞ്ചിനാണ് BKX 250 ന് കരുത്ത് പകരുന്നത്. ഈ എഞ്ചിൻ നേരത്തെയും കമ്പനി ഉപയോഗിച്ചിട്ടുണ്ടെങ്കിലും കൂളിംഗ്, ഇൻടേക്ക്, എക്സ്ഹോസ്റ്റ് എന്നിവയിൽ മാറ്റം വരുത്തിയിരിക്കുന്നു.
2023-ൽ വാഹനം വിപണിയിലെത്തുമെന്നാണ് ബെനെല്ലി അറിയിച്ചിരിക്കുന്നത്. BKX 250-ന്റെ സിംഗിൾ സിലിണ്ടർ എഞ്ചിൻ 9,250 ആർപിഎമ്മിൽ 25.8 ബിഎച്ച്പിയും 8,000 ആർപിഎമ്മിൽ 21 എൻഎം ടോർക്കും ഉൽപ്പാദിപ്പിക്കുന്നു. ആറ് സ്പീഡ് ഗിയർബോക്സുമായാണ് വാഹനം എത്തുന്നത്. 220 എംഎം ഗ്രൗണ്ട് ക്ലിയറൻസ്, 180 എംഎം സസ്പെൻഷൻ ട്രാവൽ, വയർ സ്പോക്ക് വീലുകൾ എന്നിവയുള്ള ഓഫ്-റോഡ് റെഡി ക്വാർട്ടർ-ലിറ്റർ അഡ്വഞ്ചർ ബൈക്കാണ് ബെനെല്ലി ബികെഎക്സ് 250.
BKX 250-ന് 165 കിലോഗ്രാം ഭാരവും 835 mm സീറ്റ് ഉയരവും 220 mm ഗ്രൗണ്ട് ക്ലിയറൻസും ഉണ്ട്. ഇത് ബൈക്കിന്റെ ഓഫ്-റോഡ് ശേഷിയെ അടിവരയിടുന്നതാണ്. നാല് പിസ്റ്റൺ കാലിപ്പറുള്ള 280 എംഎം ഫ്രണ്ട് ഫ്ലോട്ടിംഗ് ഡിസ്കും സിംഗിൾ പിസ്റ്റൺ ഫ്ലോട്ടിംഗ് കാലിപ്പറുള്ള 240 എംഎം റിയർ ഡിസ്കും വാഹനത്തിന്റെ ബ്രേക്കിംഗ് കൈകാര്യം ചെയ്യുന്നു. BKX 250-ന്റെ കൂടുതൽ റോഡ്-ഗോയിംഗ് എസ് പതിപ്പും ബെനെല്ലി വികസിപ്പിച്ചിട്ടുണ്ട്. 2023 അവസാനത്തിന് മുമ്പ് BKX 250 ഇന്ത്യയിൽ വരുമെന്ന് പ്രതീക്ഷിക്കുന്നില്ല.
