മണിക്കൂറുകളോളം കമ്പ്യൂട്ടറും മൊബൈൽ ഫോണും ഉപയോഗിക്കുന്നവരാണ് നമ്മളിൽ ഭൂരിഭാഗം പേരും.ജോലിസബന്ധമായും വിനോദത്തിനായും ഇങ്ങനെ കമ്പ്യൂട്ടറിനും ഫോണിനും മുമ്പിൽ ഇടവേളകളില്ലാതെ ചിലവഴിക്കുന്നത് കണ്ണിന് ദോഷകരമാണെന്ന് നമുക്കറിയാം.
എന്നാൽ നിങ്ങളറിയാത്ത മറ്റൊരു കാര്യമുണ്ട്, കണ്ണിനെ മാത്രമല്ല നമ്മുടെ കൈകളെയും ഇത് ബാധിക്കും.ഫോൺ ലാപ്ടോപ്, എന്നിവയിലെല്ലാം നിരന്തരമായി ടൈപ്പ് ചെയ്യുന്ന പലർക്കും കേട്ട് പരിചയമില്ലാത്ത ഒന്നാണ് കാർപ്പൽ ടണൽ സിൻഡ്രം എന്നത്. ശ്രദ്ധിച്ച് വേണ്ടത്ര ചികിത്സ നൽകിയില്ലെങ്കിൽ ദീർഘകാലത്തെ റെസ്റ്റ് വേണ്ടിവരും നമുക്കൊന്ന് പൂർവ്വ സ്ഥിതിയിലേക്ക് മാറാൻ.
നമ്മുടെ കൈയിൽനിന്ന് കൈപ്പത്തിയിലേക്ക് പോകുന്ന ഒരു ഞരമ്പുണ്ട്, മീഡിയൻ നെർവ് എന്നാണിതിനെ പറയുക. ഈ ഞരമ്പ് മണികണ്ഠത്തിലൂടെ ചെറിയൊരു ‘ടണൽ’ പോലുള്ള സ്ഥലത്തുകൂടിയാണ് കൈപ്പത്തിയിലേക്ക് പ്രവേശിക്കുന്നത്. തുടർച്ചയായി മണികണ്ഠത്തിൽ ആഘാതമേൽപിക്കുന്ന ജോലികൾ, ഇതിലൂടെ കടന്നുപോകുന്ന തന്തുക്കൾ ഉൾപ്പെടെയുള്ള ഭാഗങ്ങളിൽ നീർവീഴ്ച ഉണ്ടാക്കുകയും ആ ഭാഗത്ത് വീക്കം ഉണ്ടാവുകയും ചെയ്യുന്നു. ഇങ്ങനെയുള്ള വീക്കം ടണലിന്റെ ഉൾവിസ്താരം കുറയ്ക്കുകയും മീഡിയൻ നെർവിനെ ഞെരുക്കുകയും ചെയ്യുന്നു.
കൈകൾക്ക് ശക്തിയായ വേദന,മരവിപ്പ് തുടങ്ങിയവയിലേക്കാണ് ഈ രോഗാവസ്ഥ വഴിയൊരുക്കുന്നത്. കൈകളുടെ ചലനം സ്ഥിരമായി ഒരേ രീതിയിൽ ആകുമ്പോൾ കണങ്കൈയുടെ ഭാഗത്തെ ഞെരമ്പ് ഞെരുങ്ങുന്നത് മൂലമാണ് ഇതുണ്ടാകുന്നതത്രേ.ചെറിയ കുട്ടികൾക്ക് വരെ ഇത് വരാനുള്ള സാധ്യതയുണ്ട്.
ഇടക്കിടെ കൈകകൾക്ക് ഇടവേളയും വ്യായാമവും നൽകിയാൽ മാത്രമേ ഇത് പ്രതിരോധിക്കാനാവൂ. അല്ലെങ്കിൽ രോഗം ഗുരുതരമായാൽ ഓപ്പറേഷൻ വരെ വേണ്ടി വന്നേക്കാം. തുടർച്ചയായി കീബോർഡ് ഉപയോഗിക്കുന്നവർ റിസ്റ്റ്റെസ്റ്റ് എർഗൊണോമിക്ക് ഗ്ലൗ, മൗസ്പാഡ് ഇവ ഉപയോഗിക്കുന്നത് നല്ലതാണ്. കൈപ്പത്തിക്കും കുഴയ്ക്കും പ്രാധാന്യം കൊടുത്തുകൊണ്ടുള്ള ചെറുവ്യായാമങ്ങൾ ശീലമാക്കുകയും വേണം.
രോഗത്തെ എങ്ങനെ തിരിച്ചറിയാം
ക്ലിനിക്കൽ എക്സാമിനേഷനിലൂടെ കണ്ടെത്താൻ സാധിക്കും. നെർവ് കണ്ടക്ഷൻ സ്റ്റഡിയിലൂടെയും കാർപ്പൽ ടണൽ സിൻഡ്രം കണ്ടെത്താവുന്നതാണ്. കൈയ്ക്ക് വരുന്ന എല്ലാ തരിപ്പുകളും കാർപ്പൽ ടണൽ സിൻഡ്രമായി കണക്കാക്കരുത്. കൃത്യമായി രോഗം ഇതാണെന്ന് ഉറപ്പുവരുത്തേണ്ടത് അത്യാവശ്യമാണ്.
തുടക്കത്തിലേ ഈ രോഗം കണ്ടെത്തിയവർക്ക് മരുന്നുകൾ, സ്റ്റിറോയ്ഡ് ഇഞ്ചക്ഷൻ എന്നിവയാണ് കൊടുക്കുക. ചില രോഗികൾക്ക് ഈ ചികിത്സകൊണ്ടുതന്നെ മാറ്റമുണ്ടാകും. രോഗത്തിന്റെ തീവ്രത കൂടിയവർക്ക് ചെറിയ സർജറി ചെയ്യേണ്ടി വരും. സർജറി കഴിഞ്ഞ് ഒരു മണിക്കൂറിനുള്ളിൽ തന്നെ അസുഖം പൂർണ്ണമായും മാറുന്നതായിരിക്കും.
