തുണി അലക്കുമ്പോൾ നേരിടുന്ന പ്രധാന പ്രശ്നമാണ് തുണിയുടെ നിറം ഇളകി പോകുന്നത്. പുതിയതും ഏറെ ഇഷ്ടമുള്ളതുമായ വസ്ത്രങ്ങളുടെ നിറം ഇളകി പോകുന്നത് ആർക്കും സഹിക്കാൻ കഴിയുന്ന ഒന്നല്ല. വളരെ കുറച്ച് വസ്ത്രങ്ങൾ മാത്രമായിരിക്കും നമുക്ക് ഉണ്ടാവുക. അവ നരയ്ക്കാതെ നിറം നഷ്ടപ്പെടാതെ എങ്ങനെ അലക്കാം എന്ന് പലരും ചിന്തിക്കാറുണ്ട്. പുതിയ ഷർട്ടിന്റെയും ജീൻസിന്റെയും നിറം അലക്കുമ്പോൾ ഇളകുമെന്നത് ഉറപ്പാണ്. അലക്കുമ്പോഴെല്ലാം നിരന്തരം നിറം ഇളകിയാൽ വസ്ത്രം പെട്ടന്ന് നരച്ചു പോകുന്നു. ഇതിനെന്താണ് ഒരു പോംവഴി എന്ന് പലരും ചിന്തിക്കുന്നു. എന്നാൽ അതിന് ഒരു നിസാര വഴിയുണ്ട്.
ആദ്യം ഒരു ബക്കറ്റിന്റെ കാൽ ഭാഗം വെള്ളം എടുക്കുക. അതിലേയക്ക് ഒരു സ്പൂൺ വിനാഗിരി ഒഴിച്ചു കൊടുക്കണം. തുണി കൂടുതലുണ്ടെങ്കിൽ അതിന് ആവശ്യമായ തരത്തിൽ വിനാഗിരി ഒഴിച്ചു കൊടുക്കേണ്ടതുണ്ട്. വെള്ളത്തിലേയ്ക്ക് മൂന്ന് സ്പൂൺ ഉപ്പു കൂടി ഇട്ടു കൊടുക്കുക. ശേഷം ബക്കറ്റിലെ വെള്ളം നന്നായി ഇളക്കണം.
വിനാഗിരിയും ഉപ്പും ചേർത്ത് ഇളക്കി വച്ച വെള്ളത്തിൽ അലക്കാനുള്ള തുണി കുതിർത്തു വെയ്ക്കണം. ഏകദേശം മൂന്ന് മണിക്കൂർ നേരമെങ്കിലും വെള്ളത്തിൽ തുണി മുങ്ങി കിടക്കണം. ബക്കറ്റിലിട്ടിരിക്കുന്ന തുണിയുടെ മുകളിലായി വെള്ളം നിൽക്കണമെന്നത് പ്രത്യേകം ശ്രദ്ധിക്കണം. നിറം ഇളകുന്ന തുണി ആണെങ്കിൽ ഇതിനോടകം അത് ഇളകി വന്നിട്ടുണ്ടാവും. ഈ വെള്ളം മാറ്റിയ ശേഷം മൂന്ന് തവണയോളം വെള്ളം മാറ്റി തുണി നന്നായി തിരുമുക. ഇതോടെ തുണിയുടെ നിറം ഇളകുന്ന പ്രശ്നത്തിന് പരിഹാരമാകും. പിന്നീട് ഒരിക്കൽ പോലും ഈ തുണികളിൽ നിന്ന് കളർ ഇളകി വരില്ല. ധൈര്യമായി മറ്റ് തുണികൾക്കൊപ്പം ഇട്ട് അലക്കുകയും ചെയ്യാം.
