സ്വന്തമായി ഒരു വീട് പലരുടെയും സ്വപ്നമാണത് . എന്നാൽ അത്യാധുനിക സൗകര്യങ്ങൾ ഉള്ള ഒരു വീട് വയ്‌ക്കുന്ന പണം കൊണ്ട് ഒരു ഗ്രാമം മുഴുവൻ സ്വന്തമാക്കാനുള്ള അവസരം വന്നാലോ . അത്തരമൊരു അവസരമാണ് സ്പെയിനിൽ ഒരുങ്ങിയിരിക്കുന്നത്.
ഹോട്ടലും സ്കൂളും പള്ളിയും എന്തിനേറെ ഒരു മുനിസിപ്പൽ സ്വിമ്മിങ് പൂൾ വരെയുള്ള ഗ്രാമമാണിത് .സ്പെയിനിന്റെയും പോർച്ചുഗലിന്റെയും അതിർത്തി പ്രദേശത്തായി സ്ഥിതിചെയ്യുന്ന ഗ്രാമത്തിന്റെ പേര് സാൾട്ടോ ഡി കാസ്ട്രോ . 44 വീടുകളുള്ള ഈ ഗ്രാമം 2,27,000 യൂറോ (2.1 കോടി രൂപ) കൊടുത്താൽ സ്വന്തമാക്കാം . കഴിഞ്ഞ 30 വർഷമായി ജനവാസം ഇല്ലാത്ത സ്ഥലമാണ് ഇതെന്നൊരു കുഴപ്പം മാത്രമേ ഉള്ളൂ .
1950 കളിൽ ഒരു വൈദ്യുതി ഉത്പാദന കമ്പനി റിസർവോയറിന്റെ നിർമ്മാണത്തിന് എത്തിയ തൊഴിലാളികളെ ഈ ഗ്രാമത്തിൽ പാർപ്പിച്ചിരുന്നു. റിസർവോയറിന്റെ നിർമ്മാണം പൂർത്തിയായതോടെ തൊഴിലാളികൾ ഇവിടം വിട്ടു പോവുകയും ചെയ്തു. പിന്നീട് ഇങ്ങോട്ട് പതിറ്റാണ്ടുകളായി ആൾപാർപ്പില്ലാതെ തുടരുകയാണ് ഈ ഗ്രാമം. സ്പെയിനിലെ ഒരു സ്ഥലക്കച്ചവട വെബ്സൈറ്റിലാണ് നിലവിൽ ഗ്രാമം വില്പനയ്‌ക്കായി പരസ്യപ്പെടുത്തിയിരിക്കുന്നത് . ഒരു നിബന്ധന കൂടി വെബ്സൈറ്റ് വയ്‌ക്കുന്നുണ്ട് . ഗ്രാമം നൂറു ശതമാനം പ്രവർത്തനക്ഷമമാക്കുന്നതിനും ലാഭകരമാക്കുന്നതിനും ആവശ്യമായ നിക്ഷേപം രണ്ടു ദശലക്ഷം യൂറോയിൽ കവിയരുത് എന്നതാണത്.
2000 ൽ ഒരാൾ ഇവിടം വിലയ്ക്ക് വാങ്ങിയിരുന്നു. സൗകര്യങ്ങൾ ഏറെയുള്ള പ്രദേശം ഒരു ടൂറിസ്റ്റ് കേന്ദ്രമാക്കണമെന്ന ഉദ്ദേശത്തോടെയാണ് അദ്ദേഹം ഗ്രാമം സ്വന്തമാക്കിയത്. എന്നാൽ അദ്ദേഹത്തിന് ഈ സ്വപ്നം യാഥാർത്ഥ്യമാക്കാനാവാതെ വന്നു. അങ്ങനെയാണ് ഗ്രാമം ഇപ്പോൾ വിൽപ്പനയ്‌ക്ക് വച്ചിരിക്കുന്നത്.
