യുഎഇ: ആളുകൾ കടിക്കാനാഗ്രഹിക്കുന്ന സുന്ദരനായ സ്ട്രോബറിയാണ് താനെന്ന് സ്വയം വിശേഷിപ്പിച്ച് പോർച്ചുഗൽ താരം ക്രിസ്റ്റിയാനോ റൊണാൾഡോ. മുതിർന്ന ബ്രിട്ടീഷ് മാദ്ധ്യമപ്രവർത്തകൻ പിയേയ്സ് മോർഗന് നൽകിയ പ്രത്യേക അഭിമുഖത്തിലാണ് താരത്തിന്റെ ഈ പരാമർശം. എന്തുകൊണ്ടാണ് എല്ലാവരും ശ്രദ്ധിക്കുന്നതും പിന്തുടരുന്നതുമായ കളിക്കാരൻ ആയതെന്ന മോർഗന്റെ ചോദ്യത്തിനായിരുന്നു താരത്തിന്റെ രസകരമായ മറുപടി.
നന്നായി ഫുട്ബോൾ കളിക്കുന്നത് കൊണ്ട് മാത്രമല്ല ആളുകൾ എന്നെ ഇഷ്ടപ്പെടുന്നത്. ബാക്കിയുള്ള കാര്യങ്ങളും പ്രസക്തമാണെന്ന് ഞാൻ കരുതുന്നു,സൗന്ദര്യവും സഹായിക്കുന്നു.സുന്ദരനായത് കൊണ്ട് കൂടിയാണ് ആളുകൾ ഇഷ്ടപ്പെടുന്നത് .ആളുകൾക്ക് നമ്മളോട് ഒരു അടുപ്പം തോന്നണം,ഞാൻ സുന്ദരനാണ് ,ആളുകൾ കടിക്കാനാഗ്രഹിക്കുന്ന ഒരു സ്ട്രോബറിയാണ് ഞാൻ എന്നായിരുന്നു താരത്തിന്റെ മറുപടി.
Ronaldo puts his success down to being a strawberry people want to bite. 🍓🤔
— Ben Jacobs (@JacobsBen) November 16, 2022
പത്രങ്ങൾ വായിക്കാൻ ഇഷ്ടമല്ലെന്നും അവയെല്ലാം കള്ളം പറയുന്നുവെന്നും ക്രിസ്റ്റ്യാനോ വിമർശിച്ചു. പത്രങ്ങൾ പലതും മാലിന്യമാണ്, അവ കള്ളം പറയുന്നു.അവർ എന്നെയും എന്റെ കുടുംബത്തെയും നിരന്തരം വിഷമിപ്പിക്കാൻ ശ്രമിക്കുമ്പോൾ ഞാൻ എന്തിനാണ് വായിക്കാൻ പോകുന്നത്? എന്നെ ഇഷ്ടപ്പെടുന്ന ആളുകളെ ഞാൻ ശ്രദ്ധിക്കുന്നു. എന്നെ ഇഷ്ടപ്പെടാത്ത ആളുകൾക്ക് വേണ്ടി ഞാൻ സമയം കളയുന്നില്ല. ഇത് സമയം പാഴാക്കലാണെന്ന് ഞാൻ കരുതുന്നു, ഈ ആളുകൾ എന്റെ ജീവിതത്തിൽ നല്ലത് വരണമെന്ന് താൽപ്പര്യമുള്ളവരല്ലെന്ന് അദ്ദേഹം പറഞ്ഞു.
അഭിമുഖത്തിൽ ക്രിസ്റ്റ്യാനോ ക്ലബിനും പരിശീലകനുമെതിരെ കടുത്ത വിമർശനം ഉയർത്തിയിരുന്നു. മാഞ്ചസ്റ്റർ യുണൈറ്റഡ് തന്നെ വഞ്ചിച്ചെന്നും പരിശീലകൻ എറിക് ടെൻ ഹാഗിനോട് തനിക്ക് ബഹുമാനമില്ലെന്നും താരം പറഞ്ഞു. തന്നെ ബഹുമാനിക്കാത്ത ഒരാളെ താനും ബഹുമാനിക്കില്ലെന്നും ക്ലബിലെ എക്സിക്യൂട്ടീവ് പദവിയിലിക്കുന്ന ചിലർ തന്നെ പുകച്ച് പുറത്ത് ചാടിക്കാൻ ശ്രമിച്ചതായും താരം ആരോപിച്ചു. അഭിമുഖത്തിനു പിന്നാലെ ക്രിസ്റ്റ്യാനോയുടെ ചുവർ ചിത്രം യുണൈറ്റഡ് ഹോം സ്റ്റേഡിയമായ ഓൾഡ് ട്രാഫോർഡിൽ നിന്ന് നീക്കി.
