ന്യൂഡൽഹി : മുല്ലപ്പെരിയാർ അണക്കെട്ടിന്റെ സുരക്ഷാ പരിശോധന നടത്തണം എന്ന് ആവശ്യപ്പെട്ട് സുപ്രീം കോടതിയിൽ അപേക്ഷ. അണക്കെട്ടിന്റെ സുരക്ഷാ പരിശോധന നടത്താൻ മേൽനോട്ട സമിതിക്ക് നിർദ്ദേശം നൽകണം. പരിശോധന പൂർത്തിയാക്കുന്നതിന് സമയക്രമം കോടതി നിശ്ചയിക്കണമെന്നും അപേക്ഷയിൽ ആവശ്യപ്പെട്ടിട്ടുണ്ട്. അണക്കെട്ടിന്റെ സുരക്ഷയുമായി ബന്ധപ്പെട്ട് സുപ്രീംകോടതിയിൽ മുൻപ് ഹർജി നൽകിയിരുന്ന ഡോ.ജോ ജോസഫാണ് പുതിയ അപേക്ഷ സമർപ്പിച്ചിരിക്കുന്നത്.
അഭിഭാഷകൻ ടി.ജി.എൻ. നായർ മുഖേനെയാണ് അപേക്ഷ ഫയൽ ചെയ്തത്.മുല്ലപ്പെരിയാർ അണക്കെട്ടിന്റെ സുരക്ഷാ പരിശോധന ഏറ്റവുമൊടുവിൽ നടന്നത് 2010-11 കാലഘട്ടത്തിലാണ്. കേന്ദ്ര ജല കമ്മീഷൻ പ്രസിദ്ധീകരിച്ചിട്ടുള്ള മാർഗരേഖ പ്രകാരം രാജ്യത്തെ എല്ലാ വലിയ അണക്കെട്ടുകളുടെയും സുരക്ഷാ പരിശോധന പത്തുവർഷത്തിൽ ഒരിക്കൽ നടത്തേണ്ടതാണ്. മുല്ലപ്പെരിയാറിൽ അവസാനമായി പരിശോധന നടത്തിയതിന് ശേഷം കേരളത്തിൽ രണ്ട് പ്രളയങ്ങൾ ഉണ്ടായി തുടങ്ങിയ കാര്യങ്ങളാണ് സുപ്രീം കോടതിയിൽ ഫയൽ ചെയ്ത അപേക്ഷയിൽ വ്യക്തമാക്കിയിരിക്കുന്നത്.
1979-ലും 2011-ലുമുണ്ടായ ചെറിയ ഭൂചലനങ്ങളിൽ അണക്കെട്ടിന് വിള്ളലുകളുണ്ടായിട്ടുണ്ട്. അണക്കെട്ടിന് ഘടനാപരമായ ബലക്ഷയമുണ്ട്, തകർച്ചാ സാധ്യത തള്ളിക്കളയാനാകില്ല. ഇത് ഐക്യരാഷ്‌ട്ര സംഘടനാ യൂണിവേഴ്സിറ്റി റിപ്പോർട്ടിൽ വ്യക്തമാക്കിയിട്ടുണ്ടെന്നും അപേക്ഷയിൽ പറയുന്നു.അപേക്ഷ ജസ്റ്റിസ് എം.ആർ. ഷാ അദ്ധ്യക്ഷനായ ബെഞ്ച് പരിഗണിച്ചേക്കും.
