ആരാധകർക്കെന്നും പ്രിയപ്പെട്ടവരാണ് രൺബീർ കപൂറും , ആലിയ ഭട്ടും . ഇരുവരെയും ബന്ധപ്പെട്ട് പുറത്ത് വരുന്ന വാർത്തകൾക്കും വിശേഷങ്ങൾക്കും ഏറെ സ്വീകാര്യതയാണ് ലഭിക്കുന്നത്. കഴിഞ്ഞ ദിവസമാണ് ആലിയ ഒരു പെൺകുഞ്ഞിന് ജന്മം നൽകിയത്. ഇപ്പോഴിതാ കുഞ്ഞുമായി ബന്ധപ്പെട്ട് പുതിയ സന്തോഷം പങ്കുവച്ചിരിക്കുകയാണ് താരങ്ങൾ.
മകൾക്ക് പേരിട്ടതിന്റെ വിശേഷങ്ങളാണ് താരം ഇൻസ്റ്റാഗ്രാമിലൂടെ പങ്കുവച്ചിരിക്കുന്നത്. കുഞ്ഞിനൊപ്പമുള്ള ചിത്രം പങ്കുവച്ചു കൊണ്ടാണ് രാഹ എന്ന പേര് ആലിയ ഏവരെയും അറിയിച്ചത്. രൺബീറാണ് പേര് തിരഞ്ഞെടുത്തതെന്നും ആലിയ ഇൻസ്റ്റയിൽ കുറിച്ചിട്ടുണ്ട്.
സ്വാഹിലിയിൽ രാഹ എന്നതിന്റെ അർത്ഥം ദൈവിക പാതയെന്നും,സംസ്കൃതത്തിൽ അവൾ സന്തോഷമാണ്, ബംഗ്ലയിൽ വിശ്രമം, ആശ്വാസം, അറബിയിൽ സമാധാനം, സന്തോഷം, സ്വാതന്ത്ര്യം, ആനന്ദം എന്നിവയുമാണെന്നും താരം കുറിച്ചിട്ടുണ്ട്. ഒപ്പം കുഞ്ഞിനെ തങ്ങളുടെ ജീവിതത്തിലേക്ക് കൊണ്ട് വന്നതിന് ദൈവത്തിന് നന്ദിയും പറയുന്നു.
അതേസമയം ഒരു കുട്ടിയെ പൊതുസമൂഹത്തിൽ വളർത്താൻ തനിക്ക് അൽപ്പം ആശങ്കയുണ്ടെന്ന് അടുത്തിടെ ഒരു വാരികയ്ക്ക് നൽകിയ അഭിമുഖത്തിൽ ആലിയ പറഞ്ഞിരുന്നു.തന്റെ കുഞ്ഞിന്റെ ജീവിതത്തിലേത്ത് ആരുടേയും കടന്നു കയറ്റം ഉണ്ടാകാൻ താൻ ആഗ്രഹിക്കുന്നില്ലെന്നും താരം വ്യക്തമാക്കിയിരുന്നു.
