ദോഹ: ഫുട്ബോൾ ചരിത്രത്തിലേക്ക് പിഴയ്ക്കാത്ത ഷോട്ട് പായിച്ച് പാഞ്ഞു കയറി പോർച്ചുഗീസ് ഇതിഹാസ താരം ക്രിസ്റ്റ്യാനോ റൊണാൾഡോ. ഘാനക്കെതിരായ മത്സരത്തിന്റെ അറുപത്തിയഞ്ചാം മിനിറ്റിൽ പെനാൽറ്റിയിൽ നിന്നുമാണ് ക്രിസ്റ്റ്യാനോ ഗോൾ കണ്ടെത്തിയത്. ഇതോടെ, അഞ്ച് ലോകകപ്പുകളിൽ ഗോൾ നേടുന്ന ആദ്യ താരം എന്ന ചരിത്ര നേട്ടത്തിനുടമായായിരിക്കുകയാണ് പറങ്കി പടനായകൻ.
പെനാൽറ്റി ബോക്സിൽ റൊണാൾഡോയെ വീഴ്ത്തിയ സലിസുവിനെതിരെയായിരുന്നു റഫറിയുടെ വിസിൽ. അനുവദിക്കപ്പെട്ട പെനാൽറ്റിയിൽ പ്രാർത്ഥനാപൂർവം കിക്കെടുത്ത റൊണാൾഡോ ആരാധകരുടെ ആർത്തിരമ്പലുകൾ ജയഭേരിയാക്കി ഫുട്ബോൾ ചരിത്രത്തിൽ ഇതിഹാസ രചന നടത്തുകയായിരുന്നു.
റൊണാൾഡോ നേടിയ ഗോളിനെതിരെ, നിമിഷങ്ങൾക്കകം ആന്ദ്രെ അയു ഘാനയുടെ സമനില ഗോൾ കണ്ടെത്തി. എന്നാൽ ഫെലിക്സിന്റെ ഗോളിൽ വീണ്ടും പോർച്ചുഗൽ മുന്നിലെത്തി. റഫേൽ ലിയാവോയിലൂടെ പറങ്കിപ്പട മൂന്നാം ഗോളും നേടി. നിലവിൽ ഒന്നിനെതിരെ മൂന്ന് ഗോളുകൾക്ക് മുന്നിലാണ് ഘാനക്കെതിരെ പോർച്ചുഗൽ.
Comments