നെയിൽ പോളീഷ് ഇഷ്ടമില്ലാത്ത സ്ത്രീകൾ വിരളമായിരിക്കും. പല നിറങ്ങളിലുള്ള നെയിൽ പോളീഷുകൾ വസ്ത്രങ്ങൾക്ക് ചേരുന്ന വിധത്തിലും അല്ലാതെയുമൊക്കെ പെൺകുട്ടികൾ ധരിക്കാറുണ്ട്. ചിലരുടെ പക്കൽ നെയിൽ പോളീഷുകളുടെ വമ്പൻ ശേഖരവുമുണ്ടാകും. ദിവസവും നെയിൽ പോളീഷ് മാറ്റിയിടുന്നവരുമുണ്ട്. ഇത്തരക്കാർ നെയിൽ പോളീഷ് റിമൂവറെയാണ് പൊതുവെ ആശ്രയിക്കുക. എന്നാൽ പലപ്പോഴും നമ്മുടെ കയ്യിൽ ഈ റിമൂവർ ഉണ്ടാകണമെന്നില്ല. അത്തരം സാഹചര്യങ്ങളിൽ ബദലായി ഉപയോഗിക്കാവുന്ന മാർഗങ്ങൾ എന്തെല്ലാമാണെന്ന് നോക്കാം..
എതെങ്കിലും തരത്തിലുള്ള ആൽക്കഹോൾ വീട്ടിലുണ്ടെങ്കിൽ അവ നെയിൽ പോളീഷ് റിമൂവറായി ഉപയോഗിക്കാം. പെർഫ്യൂം നല്ലൊരു മാർഗമാണ്. സ്‌പ്രേകളിൽ ആൽക്കഹോൾ അടങ്ങിയിരിക്കുന്നതിനാൽ അവ മികച്ച നെയിൽ പോളീഷ് റിമൂവറായി പ്രവർത്തിക്കും.
ആദ്യം നഖത്തിന് മുകളിൽ സ്‌പ്രേ അടിക്കുക, ശേഷം ഒരു കോട്ടൺ തുണിയോ പഞ്ഞിയോ എടുത്ത് അതിലേക്കും സ്‌പ്രേ അടിച്ചു കൊടുക്കുക. എന്നിട്ട് നഖങ്ങളിൽ തിരുമ്മിയാൽ നെയിൽ പോളീഷ് അതിവേഗം പോകുന്നതാണ്. നെയിൽ പോളീഷ് ഇടുന്ന സമയത്ത് വിരലിൽ ആയി കഴിഞ്ഞാൽ അവ കളയാനും ആൽക്കഹോൾ ഉപയോഗിക്കാം.
സാനിറ്റൈസർ മറ്റൊരു മാർഗമാണ്. പെർഫ്യൂം ഉപയോഗിച്ച് റിമൂവ് ചെയ്യുന്നതുപോലെ ഹാൻഡ് സാനിറ്റൈസറും ഉപയോഗപ്പെടുത്താവുന്നതാണ്. മറ്റൊരു ബദൽ മാർഗമാണ് ടൂത്ത് പേസ്റ്റ്. നെയിൽ പോളീഷ് ധരിച്ച നഖങ്ങൾക്ക് മുകളിൽ ടൂത്ത് പേസ്റ്റ് പുരട്ടുക. അൽപ സമയത്തിന് ശേഷം അവ തുണി കൊണ്ട് ഉരച്ചുകളയാവുന്നതാണ്. ചെറുനാരങ്ങയുടെ നീരിൽ വിനാഗിരി ചേർത്ത് ലായിനി ഉണ്ടാക്കി അത് നഖത്തിൽ പുരട്ടിയാലും നെയിൽ പോളീഷ് മായുന്നതാണ്.
