ന്യൂഡൽഹി: ക്രിക്കറ്റിൽ ഒരു ഓവറിൽ ഏഴ് സിക്സറുകൾ പായിച്ച് റെക്കോർഡിട്ട് ഋതുരാജ് ഗെയ്ക്വാദ്. ഉത്തർപ്രദേശും മഹാരാഷ്ട്രയും തമ്മിലുള്ള വിജയ് ഹസാരെ ട്രോഫി മത്സരത്തിലാണ് താരത്തിന്റെ പ്രകടനം. മത്സരത്തിൽ മഹാരാഷ്ട്ര താരം ഇരട്ട സെഞ്ച്വറിയും നേടി. 159 പന്തിൽ 220 റൺസാണ് ബാറ്ററുടെ അത്യുജ്വല പ്രകടനം. വിജയ് ഹസാരെ ട്രോഫിയുടെ ചരിത്രത്തിലെ ഏറ്റവും മികച്ച പ്രകടനങ്ങളിലൊന്നാണ് ഗെയ്ക്വാദ് കാഴ്ച വച്ചത്.
അഹമ്മദാബാദിലെ സർദാർ പട്ടേൽ സ്റ്റേഡിയം ഗ്രൗണ്ടിലാണ് മത്സരം നടന്നത്. 10 ഫോറും 16 സിക്സും പറത്തിയാണ് ഗെയ്ക്വാദ് തന്റെ കന്നി ലിസ്റ്റ്-എ ഡബിൾ സെഞ്ച്വറി കുറിച്ചത്. ഇതോടെ ലിസ്റ്റ് എ ക്രിക്കറ്റിൽ ഒരു ഓവറിൽ ഏഴ് സിക്സറുകൾ പറത്തുന്ന ആദ്യ ഇന്ത്യൻ താരമായി ഋതുരാജ് ഗെയ്ക്വാദ്്. താരത്തിന്റെ നേട്ടത്തിനെ പ്രശംസിച്ച് നിരവധി പേരാണ് സമൂഹമാദ്ധ്യമങ്ങളിൽ എത്തിയിരിക്കുന്നത്. കളിയുടെ ചിത്രങ്ങൾ ഉൾപ്പെടെ പങ്കുവച്ചാണ് ആരാധകർ അദ്ദേഹത്തിന് അഭിനന്ദനങ്ങൾ നേരുന്നത്.
