സ്നേഹപ്രകടനങ്ങളിൽ ഏറ്റവും മനോഹരമായ ഒന്നായാണ് ചുംബനത്തെ കണക്കാക്കുന്നത്. പ്രണയവും കരുതലും വാത്സല്യവും അഭിമാനവും എല്ലാം ചുംബനത്തിലൂടെ പ്രകടമാക്കാം. സെക്കൻഡുകളോ മിനിറ്റുകളോ മാത്രം ദൈർഘ്യമുള്ളവയാണ് അവ. എന്നാൽ 58 മണിക്കൂറും 35 മിനിറ്റും 58 സെക്കൻഡും തുടർച്ചയായി ചുംബിച്ച് ആരും കൊതിക്കുന്ന നേട്ടം സ്വന്തമാക്കിയ ദമ്പതിമാരുണ്ട്.
തായ്ലൻഡിലാണ് സംഭവം. പട്ടായ ബീച്ചിൽ നടത്തിയ മത്സരത്തിലാണ് ദമ്പതിമാരായ എച്ചക്കായ് തിരനാരത്തും ലക്ഷണ തിരനാരത്തും 58 മണിക്കൂർ നിർത്താതെ ചുംബിച്ചത്. ഇതിലൂടെ ആരെയും കൊതിപ്പിക്കുന്ന ഗിന്നസ് വേൾഡ് റെക്കോർഡും അവർ സ്വന്തമാക്കി. 2013 ൽ ഫെബ്രുവരി 13,14 തിയതികളിലായിരുന്നു പ്രകടനം.വാലന്റൈൻസ് ഡേ ആഘോഷങ്ങളുടെ ഭാഗമായി റിപ്ലീസ് ബിലീവ് ഇറ്റ് ഓർ നോട്ടാണ് പട്ടായയിൽ രണ്ട് ദിവസം നീണ്ടുനിന്ന പരിപാടി സംഘടിപ്പിച്ചത്.നിബന്ധനകളുടെ നീണ്ട നിരയുള്ളതായിരുന്നു മത്സരം എങ്കിലും 70 വയസുകാരായ ദമ്പതികൾ ഉൾപ്പെടെ ഒമ്പത് ദമ്പതികൾ മത്സരത്തിൽ പങ്കെടുത്തു.
പരസ്പരം ചുംബിച്ചു കൊണ്ടേയിരിക്കണമെന്നാണ് പ്രധാന നിയമം. എല്ലാ ദമ്പതികളും മത്സരത്തിലുടനീളം നിൽക്കണം. മത്സരത്തിലുടനീളം ചുണ്ടുകൾ പരസ്പരം അമർത്തിപ്പിടിക്കണമെന്നും നിബന്ധനയിലുണ്ടായിരുന്നു. ചുംബിച്ച് കൊണ്ടുതന്നെ സ്ട്രോ ഉപയോഗിച്ച് ഭക്ഷണപാനീയങ്ങൾ കഴിക്കുന്നതും ടോയ്ലറ്റ് ഉപയോഗിക്കുന്നത് പോലും ദമ്പതികൾ ഒരുമിച്ചായിരുന്നുത്രേ.വിജയികളായതോടെ ദമ്പതികൾക്ക് ഗിന്നസ് വേൾഡ് റെക്കോർഡ് കൂടാതെ രണ്ട് ഡയമണ്ട് മോതിരങ്ങളും ഒരു ലക്ഷം രൂപ ബാറ്റ് ക്യാഷ് പ്രൈസായും ലഭിച്ചു.
