മുംബൈ: എൻഡിടിവിയുടെ 29.18 ശതമാനം ഓഹരികളും കൈയ്യാളുന്ന ആർ ആർ പി ആർ ഹോൾഡിംഗ്സിന്റെ നിയന്ത്രണം ഏറ്റെടുത്തതോടെ, സ്ഥാപനത്തിലെ ഡയറക്ടർ ബോർഡ് അംഗങ്ങളെ തീരുമാനിക്കാനുള്ള അധികാരം ഗൗതം അദാനിക്ക് ലഭിച്ചു. അദാനി ഗ്രൂപ്പിന്റെ ഉടമസ്ഥതയിലുള്ള വിശ്വപ്രധാൻ കൊമേഴ്സ്യൽ പ്രൈവറ്റ് ലിമിറ്റഡ് ആണ് ആർ ആർ പി ആർ ഹോൾഡിംഗ്സിന്റെ ഓഹരികൾ സ്വന്തമാക്കിയത്.
കഴിഞ്ഞ ദിവസവും തുറന്ന ഓഫർ സ്വീകരിക്കാൻ നിക്ഷേപകർ ആരും എത്താതിരുന്നതോടെ, എൻഡിടിവിയിലെ ഏറ്റവും വലിയ ഓഹരി ഉടമകളായിരിക്കുകയാണ് അദാനി ഗ്രൂപ്പ്. കമ്പനിയുടെ മുഴുവൻ നിയന്ത്രണവും കൈപ്പിടിയിൽ ഒതുക്കാൻ അദാനി ഗ്രൂപ്പിന് ഇനി സാങ്കേതികമായി ഏതാനും നീക്കങ്ങൾ കൂടി നടത്തിയാൽ മതിയാകും.
നിലവിൽ എൻഡിടിവിയുടെ 37.44 ശതമാനം ഓഹരികളും അദാനി ഗ്രൂപ്പിന്റെ ഉടമസ്ഥതയിലുള്ള വിശ്വപ്രധാൻ കൊമേഴ്സ്യൽ പ്രൈവറ്റ് ലിമിറ്റഡിന് സ്വന്തമാണ്. ചാനലിൽ നിയന്ത്രണം നഷ്ടമായതോടെ, എൻഡിടിവി സ്ഥാപകരായ പ്രണോയ് റോയിയും ഭാര്യ രാധിക റോയിയും കഴിഞ്ഞ ദിവസം ആർ ആർ പി ആർ ഹോൾഡിംഗ് പ്രൈവറ്റ് ലിമിറ്റഡിന്റെ ഡയറക്ടർ ബോർഡിൽ നിന്നും രാജി വെച്ചിരുന്നു.
