കാൻബെറ: ഓസ്‌ട്രേലിയൻ മുൻ ടെസ്റ്റ് ക്യാപ്റ്റൻ റിക്കി പോണ്ടിംഗ് ആശുപത്രിയിൽ. നെഞ്ചുവേദനയെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. അദ്ദേഹത്തിന്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.
നിലവിൽ ഓസ്‌ട്രേലിയ- വെസ്റ്റ് ഇൻഡീസ് ടെസ്റ്റ് മത്സരം പുരോഗമിക്കുകയാണ്. മത്സരത്തിൽ ചാനൽ7 ന് വേണ്ടി റിക്കി പോണ്ടിംഗ് ആണ് കമന്ററി പറയുന്നത്. ഉച്ചയ്‌ക്ക് ഭക്ഷണത്തിനായുള്ള ഇടവേളയ്‌ക്കിടെയായിരുന്നു അദ്ദേഹത്തിന് ശാരീരിക ബുദ്ധിമുട്ട് അനുഭവപ്പെട്ടത്. ഉടനെ ആശുപത്രിയിൽ എത്തിക്കുകയായിരുന്നു.
ചാനൽ അധികൃതർ തന്നെയാണ് റിക്കി പോണ്ടിംഗ് ആശുപത്രിയിലായ വിവരം അറിയിച്ചത്. പെർത്ത് ആശുപത്രിയിലാണ് അദ്ദേഹത്തെ പ്രവേശിപ്പിച്ചിരിക്കുന്നത്. ആരോഗ്യനില തൃപ്തികരമാണെങ്കിലും അദ്ദേഹം നിരീക്ഷണത്തിൽ തുടരുകയാണ്.
