ന്യൂഡൽഹി: ഭാരത് ജോഡോ യാത്രയ്ക്ക് ശേഷം സമാന രീതിയിൽ മറ്റൊരു പരിപാടികൂടി സംഘടിപ്പിക്കാൻ ഒരുങ്ങി കോൺഗ്രസ്. ഭാരത് ജോഡോ യാത്ര പൂർത്തിയായ ശേഷം അടുത്ത മാസം അവസാനത്തോട് കൂടിയായിരിക്കും ‘ഹാത്ത് സെ ഹാത്ത് ജോഡോ യാത്ര’ എന്ന പേരിൽ മറ്റൊരു പരിപാടി കൂടി സംഘടിപ്പിക്കുക. വാർത്താ സമ്മേളനത്തിൽ കോൺഗ്രസ് എംപി കെ.സി വേണുഗോപാലാണ് ഇക്കാര്യം അറിയിച്ചത്.
ഞായറാഴ്ച ചേർന്ന കോൺഗ്രസ് സ്റ്റിയറിംഗ് കമ്മിറ്റി യോഗത്തിലാണ് ഹാത്ത് സെ ഹാത്ത് ജോഡോ യാത്ര നടത്താൻ പാർട്ടി തീരുമാനിച്ചത്. യോഗത്തിൽ ഭാരത് ജോഡോ യാത്രയുമായി ബന്ധപ്പെട്ട കാര്യങ്ങളും വിലയിരുത്തി. ഇതേ തുടർന്നാണ് ഹാത്ത് സെ ഹാത്ത് ജോഡോ അഭിയാൻ എന്ന പേരിൽ മറ്റൊരു പരിപാടി കൂടി നടത്താൻ പാർട്ടി തീരുമാനിച്ചത്. ജനുവരി 26 ന് ആരംഭിക്കുന്ന പരിപാടി രണ്ട് മാസം നീണ്ടു നിൽക്കും.
പ്ലീനറി യോഗം ഉൾപ്പെടെ വിലയിരുത്തുന്നതിന് വേണ്ടിയാണ് സ്റ്റിയറിംഗ് കമ്മിറ്റി ചേർന്നതെന്ന് വേണുഗോപാൽ പറഞ്ഞു. ഫെബ്രുവരി പകുതിയോടെ പ്ലീനറി യോഗം ആരംഭിക്കാനാണ് തീരുമാനം. വരുന്ന ശൈത്യകാല പാർലമെന്റ് സമ്മേളനത്തിൽ രാഹുൽ ഗാന്ധി പങ്കെടുക്കില്ല. ഭാരത് ജോഡോ യാത്ര നിലവിൽ പുരോഗമിക്കുകയാണ്. അതുകൊണ്ടുതന്നെ ഇതിനൊപ്പം പാർലമെന്റ് സമ്മേളനത്തിൽ പങ്കെടുക്കുക പ്രയോഗികമാകില്ലെന്നും വേണുഗോപാൽ വാർത്താ സമ്മേളനത്തിൽ പറഞ്ഞു.
