ദുബായ്: ബ്രിട്ടീഷ് എയർവേസിൽ യാത്ര ചെയ്യുകയായിരുന്ന യുവതിക്ക് മീൽസിനൊപ്പം ലഭിച്ചത് വെപ്പുപല്ല്. ലണ്ടനിൽ നിന്ന് ദുബായിലേക്കുള്ള യാത്രക്കിടെയാണ് യുവതിക്ക് ഭക്ഷണത്തിൽ നിന്നും ‘പല്ല്’ കിട്ടിയത്. സംഗതി ഫോട്ടോയെടുത്ത് ട്വിറ്ററിൽ പങ്കുവച്ചതോടെ സംഭവം വൈറലാകുകയും ചെയ്തു.
ഒക്ടോബർ 25നായിരുന്നു ഗാഥയെന്ന യുവതിക്ക് നിർഭാഗ്യകരമായ അനുഭവമുണ്ടായത്. ഇതുവരെയും ബ്രിട്ടീഷ് എയർവേസിന്റെ ഭാഗത്ത് നിന്ന് വിശദീകരണം ലഭിച്ചില്ലെന്നും മറുപടിക്കായി കാത്തുനിൽക്കുകയാണെന്നും വെപ്പുപല്ല് കിട്ടിയ ഗാഥ ട്വിറ്ററിൽ കുറിച്ചു. എന്റെ എല്ലാ പല്ലും എന്റെ വായിൽ തന്നെയുണ്ടെന്നും യുവതി കൂട്ടിച്ചേർത്തു. കോൾ സെന്റർ മുഖേന ബ്രിട്ടീഷ് എയർവേസുമായി ബന്ധപ്പെടാൻ കഴിയുന്നില്ലെന്നും അവർ ചൂണ്ടിക്കാട്ടി.
ഭക്ഷണം കഴിച്ചുക്കൊണ്ടിരിക്കവെ മീൽസിൽ നിന്നും ലഭിച്ച വെപ്പുപല്ല് ഒരു ടിഷ്യൂ പേപ്പറിൽ വെച്ച് ഒപ്പം കഴിച്ച ഭക്ഷണവും ചേർത്തുവെച്ചുള്ള ചിത്രമായിരുന്നു ഗാഥ ട്വിറ്ററിൽ പോസ്റ്റ് ചെയ്തത്. സംഭവത്തിൽ ഇതുവരെ ബ്രിട്ടീഷ് എയർവേസ് പരസ്യ പ്രതികരണത്തിന് തയ്യാറായിട്ടില്ല.
Comments