ന്യൂഡൽഹി : ഫിഫ ഫുട്ബോൾ ലോകകപ്പിൽ ക്വാർട്ടർ ഫൈനലിൽ പുറത്തായി കണ്ണീരോടെ മടങ്ങിയ പോർച്ചുഗൽ താരം ക്രിസ്റ്റിയാനോ റൊണാൾഡോയ്ക്ക് പിന്തുണയുമായി ക്രിക്കറ്റ് താരം വിരാട് കോഹ്ലി. കായിക മേഖലയ്ക്കും ലോകമെമ്പാടുമുള്ള കായിക പ്രേമികൾക്കും വേണ്ടി നിങ്ങൾ ചെയ്തത് ഒന്നും ഒരു ട്രോഫി കൊണ്ട് അളക്കാനാകില്ലെന്ന് കോഹ്ലി ഫേസ്ബുക്കിൽ കുറിച്ചു.
”നിങ്ങൾ കളിക്കുന്നത് കാണുമ്പോൾ എനിക്കും ലോകമെമ്പാടുമുള്ള പലർക്കും എന്ത് തോന്നുന്നുവെന്നും ആളുകളിൽ നിങ്ങൾ ചെലുത്തിയ സ്വാധീനത്തെയും ഒരു പദവിക്കും വിശദീകരിക്കാൻ കഴിയില്ല. അത് ദൈവത്തിന്റെ സമ്മാനമാണ്. തന്റെ ഹൃദയം തുറന്ന് കളിക്കുന്ന ഒരാൾക്ക് ലഭിക്കുന്ന ഏറ്റവും വലിയ അനുഗ്രഹമാണ്. കഠിനാധ്വാനത്തിന്റെയും അർപ്പണബോധത്തിന്റെയും പ്രതിരൂപമായ നിങ്ങൾ ഏതൊരു താരത്തിനും പ്രചോദനമാണ്. നിങ്ങൾ എക്കാലത്തും എനിക്ക് വലിയവനാണ്” എന്നും വിരാട് കോഹ്ലി കുറിച്ചു
ലോകകപ്പ് കീരിടം എന്ന സ്വപ്നം ബാക്കിയാക്കിയാണ് റൊണാൾഡോ ഖത്തറിൽ നിന്ന് മടങ്ങിയത്. അഞ്ച് ലോകകപ്പുകളിൽ കളിച്ചെങ്കിലും ഒരിക്കൽ പോലും വിജയിക്കാനായിട്ടില്ല. പുറത്തുപോയതിന് പിന്നാലെ ഹൃദയഭേദകമായ ഒരു കുറിപ്പും റൊണാൾഡോ പങ്കുവെച്ചിരുന്നു.
പോർച്ചുഗലിന് വേണ്ടി ഒരു ലോകകപ്പ് കിരീടം നേടുക എന്നതായിരുന്നു തന്റെ ലക്ഷ്യം. അന്താരാഷ്ട്ര തലത്തിൽ ഇതുവരെ നിരവധി കിരീടങ്ങൾ നേടാൻ സാധിച്ചു. എന്നാൽ രാജ്യത്തെ ഫുട്ബോളിന്റെ നെറുകയിൽ എത്തിക്കുക എന്നതായിരുന്നു തന്റെ ആഗ്രഹം. പക്ഷെ ഇന്നലെ ആ സ്വപ്നങ്ങളെല്ലാം അവസാനിച്ചുവെന്നും റൊണാൾഡോ കുറിച്ചു.
Comments