കോട്ടയം: കള്ളുഷാപ്പിലെ വാക്കു തർക്കത്തെ തുടർന്ന് യുവാവിനെ വെട്ടിക്കൊലപ്പെടുത്താൻ ശ്രമിച്ച സംഭവത്തിൽ 3 പേർ അറസ്റ്റിൽ. കോട്ടയം ജില്ലയിലെ കടുത്തുരുത്തിയിലാണ് സംഭവം. കല്ലറ സ്വദേശി ചക്കച്ചാം ജോയി(40), അതിരമ്പുഴ സ്വദേശി ഒബാമ അഭിജിത്ത്(23), കാണക്കാരി സ്വദേശി തുരുത്തിക്കാട്ടിൽ ദീപു ജോയ്(22) എന്നിവരാണ് അറസ്റ്റിലായത്.
ചക്കച്ചാം ജോയി രണ്ട് ദിവസം മുൻപ് അരവിന്ദ് എന്നയാളെ കള്ളുഷാപ്പിൽ വെച്ച് തെറി വിളിച്ചിരുന്നു. അരവിന്ദ് തിരിച്ച് ജോയിയുമായി കലഹിച്ചിരുന്നു. ഇതിന്റെ മുൻവൈരാഗ്യം തീർക്കാൻ, കഴിഞ്ഞ ദിവസം പ്രതികൾ അരവിന്ദിനെ കരുതിക്കൂട്ടി പുത്തൻപള്ളിക്ക് സമീപം വെച്ച് വടിവാളുമായി ആക്രമിക്കുകയായിരുന്നു.
അരവിന്ദിനെ ആക്രമിച്ച ശേഷം പ്രതികൾ ഒളിവിൽ പോയിരുന്നു. തുടർന്ന് പോലീസ് നടത്തിയ അന്വേഷണത്തിനൊടുവിൽ ഇവരെ അതിരമ്പുഴയിൽ നിന്നും പിടികൂടുകയായിരുന്നു. ജില്ലാ പോലീസ് മേധാവി കെ കാർത്തിക്കിന്റെ നേതൃത്വത്തിലുള്ള അന്വേഷണ സംഘമാണ് പ്രതികളെ പിടികൂടിയത്.
