ഇവ ശീലമാക്കൂ..; രക്തസമ്മർദ്ദത്തിന് ചില ആയുർവേദ നുറുങ്ങുകൾ

ഉയർന്ന രക്തസമ്മർദ്ദം അല്ലെങ്കിൽ ഹൈപ്പർടെൻഷൻ ഒരു നിശബ്ദ കൊലയാളിയാണ്. സിസ്റ്റോളിക് പ്രഷർ 140 മി. മീ. മെർക്കുറി കണ്ടും ഡയസ്റ്റോളിക് പ്രഷർ 90 മി.മീറ്റർ മെർക്കുറി കണ്ടും ഉയരുന്ന അവസ്ഥയാണ് ഹൈപ്പർടെൻഷൻ അഥവാ ഉയർന്ന രക്തസമ്മർദ്ദം. ഇത് ഹൃദയത്തിന് അധിക ജോലിഭാരമുണ്ടാക്കുകയും ക്രമേണ ഹൃദയപ്രവർത്തനങ്ങളുടെ താളാത്മകത നിലച്ച് ഹൃദയസ്തംഭനത്തിന് കാരണമാകുകയും ചെയ്യുന്നു. പ്രമേഹം പോലെയുള്ള രോഗങ്ങൾക്ക് വിശപ്പ്, ബലഹീനത, മയക്കം തുടങ്ങിയ വ്യക്തമായ ലക്ഷണങ്ങളുണ്ട്. എന്നാൽ, രക്തസമ്മർദ്ദത്തിന്റെ കാര്യമെടുത്താൽ അത് ശരീരത്തെ എങ്ങനെ ബാധിക്കുമെന്ന് കൃത്യമായി പറയുവാൻ സാധിക്കില്ല. എങ്കിലും തലവേദന, ശ്വാസതടസ്സം, മൂക്കിൽ നിന്ന് രക്തസ്രാവം, ഉത്കണ്ഠ എന്നിവ ഉയർന്ന രക്തസമ്മർദ്ദത്തിന്റെ ലക്ഷണങ്ങളാണ്. ഉയർന്ന രക്തസമ്മർദ്ദം ചികിത്സിച്ചില്ലെങ്കിൽ ഹൃദയസ്തംഭനം മാത്രമല്ല സ്ട്രോക്ക്, വൃക്കയുടെ തകരാറ് എന്നിവയ്‌ക്കും കാരണമാകും. മരുന്നുകൾ കൂടാതെ, രക്തസമ്മർദ്ദം സ്വാഭാവികമായി നിയന്ത്രിക്കുന്നതിന് ചില ഭക്ഷണങ്ങളും സഹായിക്കും. രക്തസമ്മർദ്ദം നിയന്ത്രിക്കുന്നതിന് ഡോക്ടർമാർ നിർദ്ദേശിക്കുന്ന ചില ഭക്ഷണങ്ങൾ ഏതെല്ലാമാണെന്ന് നോക്കാം,

1. കുരുമുളക്
സുഗന്ധവ്യഞ്ജനങ്ങളുടെ രാജാവ് എന്നാണ് കുരുമുളക് അറിയപ്പെടുന്നത്. അത്രയ്‌ക്കാണ് കുരുമുളകിന്റെ ഗുണങ്ങൾ. ഏതു കാലാവസ്ഥയിലും ഭക്ഷണത്തിൽ ഉൾപ്പെടുത്താൻ സാധിക്കുന്ന ഒന്നാണ് കുരുമുളക്. ദഹനം, വാതം, കഫം എന്നിവയ്‌ക്ക് ഇവ നല്ലതാണ്. ഉയർന്ന കൊളസ്ട്രോൾ, പ്രമേഹം, രക്തസമ്മർദ്ദം എന്നിവയുള്ള ആളുകൾക്കും കുരുമുളക് ഉത്തമമാണ്. ചെറിയ ചൂടു വെള്ളത്തിൽ ഒരു കുരുമുളക് പൊടിച്ച് ചേർത്ത് ഒഴിഞ്ഞ വയറ്റിൽ കഴിക്കുക.

2. നെല്ലിക്ക
ഔഷധങ്ങളിൽ പ്രധാന ഇനങ്ങളിൽ ഒന്നായ നെല്ലിക്ക ഭക്ഷണത്തിൽ ഉൾപ്പെടുത്തുന്നത് ആരോഗ്യത്തിന് നല്ലതാണ്. നെല്ലിക്ക സ്ഥിരമായി മിതമായ അളവിൽ കഴിക്കുന്നവർക്ക് ആരോഗ്യം ലഭിക്കും. ഇത് ഉയർന്ന രക്തസമ്മർദ്ദമുള്ളവർക്ക് ഏറ്റവും മികച്ച ഭക്ഷണമാണ്. ഒഴിഞ്ഞ വയറ്റിൽ വേണം നെല്ലിക്ക കഴിക്കാൻ.

3. വെളുത്തുള്ളി
രക്തസമ്മർദ്ദത്തിനുള്ള അത്ഭുതകരമായ ഒരു പ്രകൃതിദത്ത പ്രതിവിധിയാണ് വെളുത്തുള്ളി. രക്തസമ്മർദ്ദത്തിന് വെളുത്തുള്ളി ചതച്ച വെള്ളം ഉത്തമമാണ്. ഏത് ആരോഗ്യ പ്രതിസന്ധിയേയും ഇല്ലാതാക്കാൻ ഇവ സഹായിക്കുന്നു. ഒഴിഞ്ഞ വയറ്റിൽ വേണം ഇത് ഭക്ഷിക്കാൻ.

4. കറുത്ത ഉണക്കമുന്തിരി
രക്തസമ്മർദ്ദം കുറയ്‌ക്കാൻ സഹായിക്കുന്ന പൊട്ടാസ്യം കറുത്ത ഉണക്കമുന്തിരിയിൽ അടങ്ങിയിട്ടുണ്ട്. ഉണക്കമുന്തിരി വെള്ളത്തിലിട്ടു തിളപ്പിച്ചു കുടിയ്‌ക്കുന്നത് ആരോഗ്യത്തിന് നല്ലതാണ്. രക്തസമ്മർദ്ദം തടയാൻ പ്രഭാതഭക്ഷണത്തിന് 25-30 മിനിറ്റ് മുമ്പ് വെള്ളത്തിലിട്ട് കുതിർത്ത ഉണക്കമുന്തിരി കഴിക്കുന്നത് നല്ലതാണ്.