ആരും കൊതിക്കുന്ന രൂപത്തിലേയ്ക്ക് മോട്ടോർസൈക്കിളിനെ പരിഷ്കരിക്കാൻ ആരാണ് ആഗ്രഹിക്കാത്തത്. പുതിയ രൂപത്തിലും ഭാവത്തിലും പരിഷ്കരിച്ച മോട്ടോർസൈക്കിളുകളുടെ ചിത്രങ്ങൾ സോഷ്യൽ മീഡിയയിൽ പ്രത്യക്ഷപ്പെടാറുണ്ട്. ഇപ്പോൾ ഇന്റർനെറ്റിൽ അത്തരമൊരു ചിത്രമാണ് വാഹനപ്രേമികളുടെ ശ്രദ്ധ പിടിച്ചു പറ്റുന്നത്. ഒരു ഹോണ്ട മോട്ടോർസൈക്കിളിനെ തേനിച്ചയുടെ രൂപ സാദൃശ്യത്തോടെയാണ് പരിഷ്കരിച്ചിരിക്കുന്നത്.
ഹൈദരാബാദിലുള്ള ആർഎച്ച് കസ്റ്റംസ് എന്ന മോട്ടോർസൈക്കിൾ വർക്ക് ഷോപ്പാണ് ഹോണ്ടയുടെ ക്രൂയിസർ മോട്ടോർസൈക്കിളായ ഹോണ്ട X4-നെ ഹോളിവുഡ് ആക്ഷൻ ചിത്രങ്ങളിൽ കാണുന്ന തരത്തിൽ പരിഷ്കരിച്ചിരിക്കുന്നത്.
‘ബംബിൾ ബീ’ എന്നാണ് മോട്ടോർസൈക്കിളിന് പേരിട്ടിരിക്കുന്നത്. ഹോളിവുഡ് ചിത്രമായ ‘ബംബിൾ ബീ’യിൽ നിന്നും പ്രചോദനം ഉൾകൊണ്ടാണ് ബൈക്ക് നിർമ്മിച്ചിരിക്കുന്നത്. ഹെഡ്ലാമ്പിന് പകരം ബംബിൾ ബീ ക്യാരക്ടറിന്റെ മുഖമാണ് ബൈക്കിന് നൽകിയിരിക്കുന്നത്. ഈ മുഖം അമേരിക്കയിൽ നിന്നും ഇറക്കുമതി ചെയ്തതാണ്.
കാം കവർ 1972-ലെ കാമറോ എസ്എസിന്റെതാണ്. ഇതും ഇന്ത്യയിലേയ്ക്ക് ഇറക്കുമതി ചെയ്തതാണ്. കൂടാതെ ടെയിൽ ലാമ്പും ടേൺ ഇൻഡിക്കേറ്ററും ഇറക്കുമതി ചെയ്തു. മഞ്ഞയും കറുപ്പും നിറങ്ങളിലാണ് പെയിന്റിംഗ് പൂർത്തിയാക്കിയിരിക്കുന്നത്.
മുൻ ചക്രങ്ങൾ 21 ഇഞ്ചും 130 എംഎമ്മും ആണെങ്കിൽ പിൻ ചക്രം 18 ഇഞ്ചും 300 എംഎമ്മും ആണ്. ബൈക്കിന്റെ അലോയ് വീലുകളും സ്വന്തമായി തന്നെ ആർഎച്ച് കസ്റ്റംസ് ഡിസൈൻ ചെയ്തതാണ്.
