മുംബൈ: ഇന്ത്യൻ ക്രിക്കറ്റ് താരം ശാർദുൽ ഠാക്കൂറിന്റെ വിവാഹത്തീയതി പുറത്ത്. 2023 ഫെബ്രുവരി 27ന് താരം വിവാഹിതനാകും എന്നാണ് വിവരം. സംരംഭകയും ബേക്കറുമായ മിതാലി പരുൾക്കർ ആണ് ശാർദുലിന്റെ വധു.
ഫെബ്രുവരി 25 മുതൽ വിവാഹ ആഘോഷങ്ങൾ ആരംഭിക്കും. ഫെബ്രുവരി 24 വരെ ശാർദുലിന് മത്സരങ്ങളുണ്ട്. 25ന് താരം വിവാഹാഘോഷങ്ങളിൽ പങ്ക് ചേരും. 2021ലായിരുന്നു ഇവരുടെ വിവാഹ നിശ്ചയം.
മുംബൈയിലെ കർജാത്തിലായിരിക്കും വിവാഹ ചടങ്ങുകൾ നടക്കുക. പരമ്പരാഗത മറാഠി ആചാരപ്രകാരമായിരിക്കും ചടങ്ങുകൾ. മിതാലി തന്നെ തയ്യാറാക്കുന്ന കേക്കാകും റിസപ്ഷന്റെ മുഖ്യ ആകർഷണം.
ഇന്ത്യൻ ക്രിക്കറ്റ് ടീമിലെ രണ്ട് യുവതാരങ്ങളാണ് പുതുവർഷത്തിൽ വിവാഹ ജീവിതത്തിലേക്ക് കടക്കുക. ഓപ്പണർ കെ എൽ രാഹുലും നടൻ സുനിൽ ഷെട്ടിയുടെ മകൾ ആതിയ ഷെട്ടിയുമായുള്ള വിവാഹം 2023 ജനുവരിയിലാണ്.
