സച്ചിൻ.. സച്ചിൻ! ആരവവുമായി വിമാന യാത്രികർ; വൈറലായി വീഡിയോ; മറുപടിയുമായി ക്രിക്കറ്റ് ദൈവം

സച്ചിൻ.. സച്ചിൻ! ഈ ആരവം കേൾക്കാത്ത ഒരു ക്രിക്കറ്റ് പ്രേമിയും ലോകത്തുണ്ടാകില്ല. 1989ൽ ബാറ്റുമായി ക്രീസിലിറങ്ങിയ സച്ചിൻ എന്ന പതിനാറുകാരൻ പിന്നീട് ഇതിഹാസ ക്രിക്കറ്റ് താരമായി മാറുന്ന കാഴ്ചയായിരുന്നു ലോകം കണ്ടത്. 2013ൽ അദ്ദേഹം വിരമിച്ചെങ്കിലും താരത്തെ എവിടെ വച്ച് കണ്ടാലും ആരാധകർ ആവേശത്തോടെ ആ പേരുവിളിക്കും. അത്തരമൊരു കാഴ്ചയാണ് ഇപ്പോൾ സോഷ്യൽ മീഡിയയിലും വൈറലാകുന്നത്.

പറന്നുയരാൻ തയ്യാറെടുത്ത് നിൽക്കുന്ന വിമാനത്തിൽ നിന്നുള്ള കാഴ്ചയാണിത്. ഫ്‌ളൈറ്റിൽ സച്ചിനുമുണ്ടെന്ന് സഹയാത്രികർ മനസിലാക്കി. പലരും അദ്ദേഹത്തെ കാണുകയും ചെയ്തു. വിമാനം പറന്നുയരുന്നതിന് മുമ്പ് യാത്രക്കാർക്കായുള്ള നിർദേശങ്ങൾ അനൗൺസ്‌മെന്റായി വരികയാണ്. ഇതിനിടെയാണ് വിമാനത്തിൽ ഇരിക്കുന്ന വലിയൊരു വിഭാഗം ജനങ്ങൾ സച്ചിനെ ആവേശത്തോടെ വിളിക്കുന്നത്. അതേ.. ആ പഴയ വിളി തന്നെ.. അദ്ദേഹം ബാറ്റുമായി ഇറങ്ങിയിരുന്നപ്പോൾ സ്‌റ്റേഡിയത്തിൽ മുഴങ്ങിയിരുന്നു അതേ ആരവം..

Thank you to those on my flight who were chanting my name a little while ago, reminiscent of when I used to come out to bat. Unfortunately, the seatbelt sign was on so I could not stand up to greet you. So saying a big hello to all now 👋🏻👋🏻 https://t.co/ak4GYLjMi4

— Sachin Tendulkar (@sachin_rt) December 17, 2022

ദൃശ്യങ്ങൾ അതിവേഗം ട്വിറ്ററിൽ പ്രചരിച്ചു. വൈകാതെ ക്രിക്കറ്റ് ദൈവം പ്രതികരണവുമായി എത്തി. ”ഏതാനും നിമിഷങ്ങൾക്ക് മുമ്പ് നടന്നതാണിത്. ഞാൻ കയറിയ ഫ്‌ളൈറ്റിൽ നിന്നുള്ള കാഴ്ച.. അവിടെ എന്റെ പേര് ആർത്തുവിളിച്ചവർക്ക് നന്ദി.. ബാറ്റിങ്ങിനായി ഇറങ്ങിയിരുന്ന കാലത്തെ ഓർമ്മിപ്പിച്ച നിമിഷമായിരുന്നു അത്.. വിമാനത്തിൽ സീറ്റ് ബെൽറ്റ് സൈൻ ഓൺ ആയിരുന്നു. അതിനാൽ നിർഭാഗ്യമെന്നു പറയട്ടെ എനിക്കൊന്ന് എഴുന്നേറ്റ് നിന്ന് നിങ്ങളെ കാണാനും ആശംസയറിയിക്കാനും കഴിഞ്ഞില്ല. അതിനാൽ ഇപ്പോൾ നിങ്ങൾക്കെല്ലാവർക്കും ഒരു ബിഗ് ഹലോ പറയുകയാണ്.. ” ഇതായിരുന്നു സച്ചിന്റെ വാക്കുകൾ. വൈറലായ ദൃശ്യങ്ങൾ ട്വിറ്ററിൽ പങ്കുവച്ചുകൊണ്ടായിരുന്നു സച്ചിൻ കുറിപ്പെഴുതിയത്.

ശനിയാഴ്ച രാത്രിയായിരുന്നു സംഭവം നടന്നത്. ടെൻഡുൽക്കറും ദൃശ്യങ്ങൾ പങ്കുവച്ചതോടെ വീഡിയോ വീണ്ടും വൈറലാകുകയാണ്.