താൻ ട്വിറ്ററിന്റെ സിഇഒ സ്ഥാനം ഒഴിയണോ വേണ്ടയോ എന്ന് തീരുമാനിക്കാൻ ട്വിറ്റർ ഉപയോക്താക്കൾക്ക് അവസരം നൽകി ഇലോൺ മസ്ക്. ഇത് സംബന്ധിച്ച ഒരു വോട്ടെടുപ്പാണ് മസ്ക് ഇപ്പോൾ തന്റെ ട്വിറ്റർ അക്കൗണ്ടിൽ നിന്ന് ട്വീറ്റ് ചെയ്തിരിക്കുന്നത്. ആളുകൾ രേഖപ്പെടുത്തിയ അഭിപ്രായവും വോട്ട് ചെയ്തതിന് ശേഷം അറിയാനാകും. ട്വിറ്റർ സിഇഒ സ്ഥാനം ഏറ്റെടുത്തതിന് പിന്നാലെ വിവാദമായ നിരവധി പരിഷ്കാരങ്ങളാണ് മസ്ക് ഏർപ്പെടുത്തിയത്.
ആയിരക്കണക്കിന് ജീവനക്കാരെയാണ് മസ്ക് സ്ഥാപനത്തിൽ നിന്ന് പിരിച്ചുവിട്ടത്. മുൻ യുഎസ് പ്രസിഡന്റ് ഡൊണാള്ഡ് ട്രംപ് ഉൾപ്പെടെയുള്ളവർക്ക് നേരത്തെ ഏർപ്പെടുത്തിയ വിലക്കുകൾ പിൻവലിക്കുകയും ചെയ്തിരുന്നു. അതേസമയം ട്വിറ്ററിന്റെ സിഇഒ ആയി ദീർഘകാലം തുടരാൻ തനിക്ക് താത്പര്യമില്ലെന്ന് മസ്ക് നേരത്തെ തന്നെ വ്യക്തമാക്കിയിരുന്നു. ഈ ജോലിക്കായി മറ്റൊരാളെ കണ്ടെത്തുമെന്നും പ്രഖ്യാപിച്ചിരുന്നു. നിലവിൽ ടെസ്ല ഇൻക്, സ്പേസ് എക്സ്, ദി ബോറിംഗ് കമ്പനി, ന്യൂറലിങ്ക്, മസ്ക് ഫൗണ്ടേഷൻ തുടങ്ങിയവയുടെ സിഇഒയാണ് മസ്ക്.
Comments