ടെഹ്‌റാൻ: സാമൂഹ്യമാധ്യമത്തിൽ പങ്കുവെച്ച പോസ്റ്റുമായി ബന്ധപ്പെട്ട മതനിന്ദാക്കുറ്റത്തിന് ഇറാനിൽ 23കാരിയായ വിദ്യാർഥിനിക്ക് വധശിക്ഷ വിധിച്ചതായി മനുഷ്യാവകാശ സംഘടനകൾ. മഷ്ഹദ് സ്വദേശിയായ അക്കൗണ്ടിങ് വിദ്യാർഥിനി നജ്മെ അമീനിക്കാണ് ശിക്ഷ വിധിച്ചത്.
പ്രവാചകൻ മുഹമ്മദ് നബിയെ അപമാനിച്ചെന്നർഥമുള്ള സബ് അൽ-നബി എന്ന കുറ്റമാണ് അമീനിക്കെതിരെ ചുമത്തിയിരിക്കുന്നത്. 2026 ഫെബ്രുവരി മൂന്നിന് മഷ്ഹദിൽനിന്ന് അമീനിയെ അറസ്റ്റ് ചെയ്തതത്. ഇമാമുമാരെ അപമാനിക്കുന്ന തരത്തിൽ അശ്ലീലവും അധിക്ഷേപകരവുമായ പരാമർശങ്ങൾ നടത്തിയെന്നായിരുന്നു മറ്റൊരു ആരോപണം. വിവാദമായ പോസ്റ്റിന്റെ കൃത്യമായ ഉള്ളടക്കം ഇതുവരെ പുറത്തുവിട്ടിട്ടില്ല.
പ്രതിഷേധത്തിനിടെ അറസ്റ്റിൽ; പിന്നാലെ വധശിക്ഷ
2026 ജനുവരിയിൽ ഇറാനിൽ സാമ്പത്തിക പ്രതിസന്ധിയെച്ചൊല്ലി ആരംഭിച്ച സർക്കാർവിരുദ്ധ പ്രതിഷേധങ്ങൾക്കിടെയാണ് അമീനി ആദ്യം അറസ്റ്റിലായത്. മനുഷ്യാവകാശ സംഘടനയായ ഇറാൻ ഹ്യൂമൻ റൈറ്റ്‌സിന്റെ റിപ്പോർട്ട് പ്രകാരം, സെപ്റ്റംബർ 16-നാണ് അമീനിക്ക് വധശിക്ഷ വിധിച്ചത്.
‘ലഹരിയുടെ സ്വാധീനത്തിലാണ് പോസ്റ്റ് ചെയ്തത്’
ഇറാനിലെ പത്രമായ ഖൊറാസാന്റെ റിപ്പോർട്ട് ഉദ്ധരിച്ച് ദി ഗാർഡിയൻ പറയുന്നതനുസരിച്ച്, സൈക്കഡെലിക് കൂൺ ഉപയോഗിച്ചതിനെത്തുടർന്നുണ്ടായ വിഭ്രാന്തിക്കിടെയാണ് താൻ പോസ്റ്റിട്ടതെന്ന് അമീനി കോടതിയിൽ വിശദീകരിച്ചു. എന്നാൽ കോടതി ഈ വാദം അംഗീകരിച്ചില്ലെന്നാണ് റിപ്പോർട്ട്.
അറസ്റ്റിനിടെ അമീനിക്ക് കടുത്ത ശാരീരിക മർദനമേറ്റതായും ഏകദേശം മൂന്ന് മാസത്തോളം ഏകാന്ത തടവിൽ കഴിഞ്ഞതായും മനുഷ്യാവകാശ സംഘടനകൾ ആരോപിക്കുന്നു.
മനുഷ്യാവകാശ സംഘടനകളുടെ പ്രതിഷേധം
സാമൂഹ്യമാധ്യമത്തിലെ പരാമർശത്തിന്റെ പേരിൽ വധശിക്ഷ വിധിക്കുന്നത് അഭിപ്രായസ്വാതന്ത്ര്യത്തിനും മനുഷ്യാവകാശങ്ങൾക്കും ഭീഷണിയാണെന്ന് മനുഷ്യാവകാശ സംഘടനകൾ മുന്നറിയിപ്പ് നൽകി. ഓസ്ലോ ആസ്ഥാനമായ ഇറാൻ ഹ്യൂമൻ റൈറ്റ്‌സിന്റെ കണക്കനുസരിച്ച് 2026 ജനുവരി മുതൽ സെപ്റ്റംബർ വരെ ഇറാനിൽ കുറഞ്ഞത് 604 വധശിക്ഷകൾ നടപ്പാക്കിയിട്ടുണ്ട്. ഇറാനിലെ ഇസ്‌ലാമിക ശിക്ഷാനിയമത്തിലെ 262-ാം വകുപ്പ് പ്രവാചകനെ അപമാനിക്കുന്ന പ്രവൃത്തിക്ക് വധശിക്ഷ വ്യവസ്ഥ ചെയ്യുന്നുണ്ട്.
