കോഴിക്കോട്: മെസിയുടെയും നെയ്മറിന്റെയും റൊണാൾഡോയുടെയും കൂറ്റൻ കട്ടൗട്ടുകൾ പുഴയിൽ സ്ഥാപിച്ച് പുള്ളാവൂരിലെ ഫുട്ബോൾ പ്രേമികൾ ലോകശ്രദ്ധ പിടിച്ചു പറ്റിയിരുന്നു. കൂറ്റൻ കട്ടൗട്ടുകളുടെ ചിത്രം ഫിഫ തന്നെ തങ്ങളുടെ ഔദ്യോഗിക പേജിൽ പങ്കുവെച്ചതോടെയാണ് കേരളത്തിലെ ഫുട്ബോൾ പ്രേമം ലോകമൊട്ടാകെ ശ്രദ്ധിക്കപ്പെട്ടത്. ബ്രസീലും പോർച്ചുഗലും ലോകകപ്പിൽ നിന്നും പുറത്തായതോടെ നെയ്മറിന്റെയും റൊണാൾഡോയുടെയും കട്ടൗട്ടുകൾ പുല്ലാവൂർ പുഴയിൽ നിന്നും അപ്രത്യക്ഷമായി. സൗദിയോട് തോറ്റതിന് പിന്നാലെ ബ്രസീൽ ഫാൻസുകാർ കളിയാക്കിയ മെസിയും അർജന്റീനയും തന്നെയാണ് ലോകകപ്പും കൊണ്ട് മടങ്ങിയത്. ഇപ്പോഴിതാ മെസിയെയും അർജന്റീനയെയും പരിഹസിച്ചതിന് ബ്രസീൽ ആരാധകരെ ട്രോളുകയാണ് പുള്ളാവൂരിലെ അർജന്റീന ഫാൻസ്.
‘ബ്രസീലിന് ഒരു ലോക കപ്പ’ എന്ന കുറിപ്പോടെ ഒരു കപ്പയുടെ ചിത്രമുള്ള ഫ്ലക്സ് പൂള്ളാവൂരിൽ സ്ഥാപിച്ചിരിക്കുകയാണ് അർജന്റീന ഫാൻസ്. ആറാമത്തെ കപ്പ് സ്വന്തമാക്കുമ്പോൾ നെയ്മറിന്റെ കൂറ്റൻ കട്ടൗട്ട് സ്ഥാപിക്കാൻ ബ്രസീൽ ആരാധകർ കണ്ടുവെച്ച ഇടത്താണ് പുള്ളാവൂരിലെ ബ്രസീൽ ഫാൻസിനെ കളിയാക്കി കൊണ്ട് അർജന്റീന ഫാൻസ് കപ്പയുടെ ഫ്ളക്സ് സ്ഥാപിച്ചിരിക്കുന്നത്.
ഇത്തരം ആഹ്ലാദങ്ങളൊന്നും നല്ല ഫുട്ബോൾ പ്രേമികൾക്ക് ചേരുന്നതല്ല എന്നാണ് പലരും പ്രതികരിക്കുന്നത്. അതേസമയം, കേരളത്തിലെ തന്റെ ആരാധകർക്ക് സാക്ഷാൽ നെയ്മർ തന്നെ നന്ദി പറഞ്ഞിരുന്നു. കേരളത്തിൽ നിന്നുള്ള ബ്രസീൽ ഫാൻസിന്റെ മനോഹരമായ ചിത്രം പങ്കുവെച്ചു കൊണ്ടായിരുന്നു നെയ്മർ നന്ദി അറിയിച്ചത്. ഇന്ത്യയിലെയും കേരളത്തിലെയും തങ്ങളുടെ ആരാധകർക്ക് നന്ദി അറിയിച്ച് അർജന്റീന ടീമും രംഗത്തു വന്നിരുന്നു. ടീമിന്റെ ഔദ്യോഗിക ട്വിറ്റർ പേജിലാണ് ഇന്ത്യയ്ക്കും കേരളത്തിനും അർജന്റീന നന്ദി അറിയിച്ചിരിക്കുന്നത്.
Comments