കാലിൽ സോക്സ് അണിഞ്ഞ് അതിനുള്ളിൽ ഒരു കഷ്ണം സവാള വെച്ച് കിടന്നുറങ്ങുന്ന ശീലം പലർക്കുമുണ്ട്. എന്ത് വിചിത്രമാണിതെന്ന് നിങ്ങളിൽ പലരും കരുതിയിട്ടുണ്ടാകാം. ശാസ്ത്രീയമായി തെളിയിക്കപ്പെട്ടിട്ടില്ലാത്ത ചില വിശ്വാസങ്ങളാണ് ഇത്തരം ശീലങ്ങൾക്ക് ആധാരം. അവയെന്താണെന്ന് നോക്കാം..
അണുബാധയെ ചെറുക്കാൻ ഉള്ളിക്ക് കഴിയുമെന്നാണ് ചിലർ വിശ്വസിക്കുന്നത്. മാത്രവുമല്ല സോക്സിനുള്ളിൽ ഉള്ളി വെച്ച് കാലിലണിഞ്ഞ് രാത്രി മുഴുവൻ കിടന്നുറങ്ങുന്നത് ശരീരത്തിന്റെ പ്രതിരോധ ശേഷി വർധിപ്പിക്കുമെന്നും അനുഭവസ്ഥർ പറയുന്നു. ഇതുവഴി പനി, ജലദോഷം എന്നീ അസുഖങ്ങളിൽ നിന്ന് മുക്തി നേടാമെന്നാണ് ചിലർ കരുതുന്നത്. അതിനാലാണ് പനി പിടിപെടുമ്പോൾ രോഗികൾ സോക്സ് ഇട്ട് രാത്രി കിടന്നുറങ്ങുന്നതും അതിനുള്ളിൽ സവാള കഷ്ണം ഒളിപ്പിച്ചുവയ്ക്കുന്നതും.
അതേസമയം ദിവസവും സവാള ഭക്ഷണത്തിൽ ഉൾപ്പെടുത്തിയാൽ ചില ആരോഗ്യ ഗുണങ്ങൾ ലഭിക്കുമെന്ന് ശാസ്ത്രീയമായി തെളിയിക്കപ്പെട്ടിട്ടുണ്ട്. സവാളയിലെ സൾഫറിന്റെ അംശം കൊളസ്ട്രോൾ കുറയ്ക്കാൻ സഹായിക്കും. പ്രമേഹത്തെ നിയന്ത്രിക്കും. സവാളയിൽ അടങ്ങിയിരിക്കുന്ന ആന്റി ഓക്സിഡന്റുകൾ പ്രതിരോധ ശേഷി വർധിപ്പിക്കും. അൽഷിമേഴ്സ് പോലുള്ള ഡീജനറേറ്റീവ് രോഗങ്ങളുടെ സാധ്യത കുറയ്ക്കാനും സവാള കഴിക്കുന്നത് സഹായകമാകും.
