ദക്ഷിണ കൊറിയൻ കാർ നിർമ്മാതാക്കളായ ഹ്യുണ്ടായിയുടെ വരാനിരിക്കുന്ന ഇലക്ട്രിക് ക്രോസ്ഓവർ ആണ് അയോണിക് 5. 2023 ജനുവരിയിൽ നടക്കുന്ന ഓട്ടോ എക്‌സ്‌പോയിലാണ് വാഹനം ലോഞ്ച് ചെയ്യുന്നത്. അതിന് മുന്നോടിയായി മോഡലിനെ വെളിപ്പെടുത്തിയിരിക്കുകയാണ് കമ്പനി. അയോണിക് 5-ന്റെ ബുക്കിംഗും ഹ്യൂണ്ടായ് ആരംഭിച്ചു. 1 ലക്ഷം രൂപ നൽകി വാഹനം ബുക്ക് ചെയ്യാം. കിയ ഇവി 6 നെക്കാൾ വില കുറവായിരിക്കും അയോണിക് 5 ന് എന്നാണ് പ്രതീക്ഷിക്കുന്നത്.
ബിയോൺഡ് മൊബിലിറ്റി പദ്ധതിയുടെ ഭാഗമായി ഹ്യുണ്ടായ് പുറത്തിറക്കുന്ന ആദ്യ വാഹനമാണ് അയോണിക് 5. 2028- നുള്ളിൽ ഇന്ത്യൻ വിപണിയിൽ ആറ് ഇലക്ട്രിക് മോഡലുകൾ അവതരിപ്പിക്കാനാണ് ബിയോൺഡ് മൊബിലിറ്റി പദ്ധതി ഹ്യൂണ്ടായി ആവിഷ്കരിച്ചിരിക്കുന്നത്. 2022-ലെ വേൾഡ് കാർ ഓഫ് ദി ഇയർ പുരസ്കാരം നേടിയ അയോണിക് പൂർണമായും ഇന്ത്യയിലേക്ക് ഇറക്കുമതി ചെയ്തായിരിക്കും വിൽപനയ്‌ക്ക് നടത്തുക.
ഫ്യുച്ചറിസ്റ്റിക് ഡിസൈനാണ് അയോണിക്കിന്റെ ഏറ്റവും വലിയ പ്രത്യേകത. മുൻഭാഗവും അലോയ് വീലുകളും പിൻഭാഗവും മനോഹരമായാണ് ഡിസൈൻ ചെയ്തിരിക്കുന്നത്. ഇ–ജിഎംപി(ഇലക്ട്രിക് ഗ്ലോബൽ മോഡുലാർ പ്ലാറ്റ്ഫോം) എന്ന ഹ്യുണ്ടായിയുടെ സ്കേറ്റ്ബോർഡ് പ്ലാറ്റ്ഫോമിലാണ് വാഹനം നിർമ്മിച്ചിരിക്കുന്നത്. ബാറ്ററിയെയും ഇലക്ട്രിക് മോട്ടോറിനെയും അടിസ്ഥാനപ്പെടുത്തി രൂപകൽപന ചെയ്ത ഹ്യുണ്ടായിയുടെ ആദ്യ മോഡലാണ് അയോണിക് 5. രണ്ട് പവർ ട്രെയിൻ വകഭേദങ്ങളും രണ്ട് ബാറ്ററി പാക്ക് വകഭേദങ്ങളും രാജ്യന്തര വിപണിയിൽ അയോണിക് 5-ന് ഉണ്ട്.
സിംഗിൾ മോട്ടോ ഫ്രണ്ട്‍വീൽ ഡ്രൈവ് മോഡലിന് 169 എച്ച്പി കരുത്തും 350 എൻഎം ടോർക്കുമുണ്ട്. ഡ്യുവൽ മോട്ടറുള്ള ഓൾ വീൽ ഡ്രൈവ് മോഡലിന് 325 എച്ച്പി കരുത്തും 605 എൻഎമ്മ് ടോർക്കുമാണ്. രണ്ടു പവർട്രെയിൻ മോഡലിനോടൊപ്പം രണ്ടു തരത്തിലുള്ള ബാറ്ററി പാക്കുമുണ്ട്. 58 kWh, 77.4 kWh എന്നിങ്ങനെ രണ്ട് ബാറ്ററി പാക്കിലാണ് വാഹനം എത്തുന്നത്. ഒറ്റ ചാർജിൽ 613 കിലോമീറ്റർ വരെ വാഹനം സഞ്ചരിക്കും. അയോണിക് 5 ലെ 800 വി ബാറ്ററി സാങ്കേതിക വിദ്യ അതിവേഗ ചാർജിംഗ് ഉറപ്പുനൽകുന്നു. 220 kWh ഡിസി ചാർജർ ഘടിപ്പിച്ചാൽ 10 ശതമാനത്തിൽ നിന്നും 80 ശതമാനം ചാർജിലേക്ക് എത്താൻ വാഹനത്തിന് വെറും 18 മിനിറ്റ് മതി. എന്നാൽ ഈ രണ്ടു മോഡലുകളിൽ ഏത് ബാറ്ററി പാക്കുള്ള മോഡലാണ് ഇന്ത്യയിൽ എത്തുക എന്ന് ഹ്യുണ്ടായ് പ്രഖ്യാപിച്ചിട്ടില്ല.
Comments