അബുദാബി: ദുബായിൽ ഗാർഹിക പീഡനം വാട്സ്ആപ്പ് വഴിയും ഇനി റിപ്പോർട്ട് ചെയ്യാം. ദുബായ് ഫൗണ്ടേഷൻ ഫോർ വുമൺ ആൻഡ് ചിൽഡ്രനാണ് പരാതികൾ അറിയിക്കാനും സഹായം തേടാനും വാട്സ്ആപ്പ് സൗകര്യം ഏർപ്പെടുത്തിയിരിക്കുന്നത്.
ഗാർഹിക പീഡനം, മനുഷ്യക്കടത്ത്, ഭീഷണി തുടങ്ങിയ അതിക്രമങ്ങൾ വാട്സ്ആപ്പ് വഴി അറിയിക്കാം. ഇരകൾക്ക് മാനസികവും സാമൂഹികവും നിയമപരവുമായ സഹായങ്ങൾക്ക് അപേക്ഷിക്കാനും സംവിധാനം ഉപയോഗിക്കാമെന്ന് അധികൃതർ അറിയിച്ചു. ഫൗണ്ടേഷന്റെ സേവനങ്ങൾ സുഗമമാക്കാനും വേഗത്തിലാക്കാനും ലക്ഷ്യമിട്ടാണ് പദ്ധതി നടപ്പിലാക്കുന്നത്. ഹോട്ട്ലൈൻ നമ്പറിലെ വാട്ട്സ്ആപ്പ് വഴിയാണ് ഫൗണ്ടേഷനിലേക്ക് സന്ദേശമയക്കേണ്ടത്.
ഫൗണ്ടേഷന്റെ സേവനങ്ങൾ കൂടുതൽ പേരിലേക്കെത്തിക്കാനും ആശയവിനിമയം എളുപ്പമാക്കും സ്മാർട്ട് ചാനലുകൾ സജീവമാക്കാനും ലക്ഷ്യമിട്ടാണ് പുതിയ സേവനം ഒരുക്കിയതെന്ന് അധികൃതർ അറിയിച്ചു. വെബ്‌സൈറ്റ് വഴിയും സാമൂഹിക മാദ്ധ്യമങ്ങൾ വഴിയും നിലവിൽ ഫൗണ്ടേഷൻ സേവനങ്ങൾ നൽകി വരുന്നുണ്ട്.
യുഎഇയിലെ സ്ത്രീകൾക്കും കുട്ടികൾക്കും സംരക്ഷണവും സഹായവും നൽകുന്നതിന് 2007ൽ സ്ഥാപിതമായ സംവിധാനമാണ് പ്രസ്തുത ഫൗണ്ടേഷൻ. ഗാർഹിക പീഡനം, കുട്ടികളെ ദുരുപയോഗം ചെയ്യൽ, മനുഷ്യക്കടത്ത് എന്നിവക്കെതിരെ പോരാടുകയാണ് ലക്ഷ്യം.
Comments