മലപ്പുറം: കരോൾ സംഘത്തിന് നേരെ മലപ്പുറത്ത് മദ്യപ സംഘത്തിന്റെ ആക്രമണം. ശനിയാഴ്ച രാത്രി പത്ത് മണിയോടെയായിരുന്നു സംഭവം. കരോൾ സംഘത്തിലുണ്ടായിരുന്ന കുട്ടികളാണ് ആക്രമിക്കപ്പെട്ടത്.
ക്രിസ്തുമസ് ആഘോഷവുമായി ബന്ധപ്പെട്ട് കരോൾ ഗാനവുമായി ഇരുപതോളം കുട്ടികളാണ് നടന്നിരുന്നത്. ഇവരെ സാമൂഹ്യവിരുദ്ധരായ മദ്യപ സംഘം വടിയും പട്ടികയും ഉപയോഗിച്ച് ആക്രമിച്ചുവെന്നാണ് പരാതി. സംഭവമറിഞ്ഞ് ഓടിയെത്തിയ നാട്ടുകാർ പോലീസിനെ വിളിച്ചു. പോലീസ് എത്തുമ്പോഴേക്കും മദ്യപ സംഘം കടന്നുകളഞ്ഞിരുന്നു.
കുട്ടികൾ വാടകയ്‌ക്ക് വാങ്ങിയ വാദ്യോപകരണങ്ങളും അക്രമി സംഘം നശിപ്പിച്ചിരുന്നു. സംഭവത്തിൽ മർദ്ദനത്തിനിരയായ കുട്ടികൾ പോലീസിൽ പരാതി നൽകി. അഞ്ച് കുട്ടികൾക്കാണ് ആക്രമണത്തിൽ പരിക്കേറ്റത്. മലപ്പുറം ചങ്ങരങ്ങുളം പെരുമുക്ക് എന്ന സ്ഥലത്താണ് ആക്രമണമുണ്ടായത്. അക്രമികളെ പോലീസ് തിരയുകയാണ്.
