ഇസ്ലാമാബാദ് : പാകിസ്താനിൽ ഭീകരാക്രമണ സാദ്ധ്യത മുൻനിർത്തി നയതന്ത്ര പ്രതിനിധികൾക്ക് മുന്നറിയിപ്പുമായി യുഎസ് വിദേശകാര്യവകുപ്പ്. നയതന്ത്ര ഉദ്യോഗസ്ഥർ ഒരു കാരണവശാലും വൻകിട പഞ്ചനക്ഷത്ര ഹോട്ടലുകളിൽ പോകരുതെന്നാണ് മുന്നറിയിപ്പ്. വിദേശപ്രതിനിധികൾ ഹോട്ടലുകളിൽ സന്ദർശിക്കുമ്പോൾ ഭീകരർ ആക്രമിക്കുമെന്നാണ് രഹസ്യാന്വേഷണ വിഭാഗം നൽകുന്ന മുന്നറിയിപ്പ്.
അമേരിക്കൻ നയതന്ത്ര പ്രതിനിധികൾ ഇസ്ലാമാബാദിലെ മാരിയറ്റ് അടക്കമുള്ള പഞ്ച നക്ഷത്ര ഹോട്ടലുകളിൽ പോകുന്നത് ഒഴിവാക്കണം. ഒപ്പം ആരാധനാലയങ്ങളിലും അതുപോലെ കൂടുതൽ ജനങ്ങൾ എത്താൻ സാദ്ധ്യതയുള്ളിടത്തും പോകരുത്. ഒപ്പം പ്രദേശിക മാദ്ധ്യമങ്ങളെ കൃത്യമായി നിരീക്ഷിക്കണമെന്നും പറയുന്നു. പ്രാദേശിക പത്രങ്ങളും ചാനലുകളും നൽകുന്ന ഭീകരാക്രമണ സാദ്ധ്യതകളെ തള്ളിക്കളയരുതെന്നും പെന്റഗണും സിഐഎ അടക്കമുള്ള അമേരിക്കയുടെ രഹസ്യാന്വേഷണ വിഭാഗവുമാണ് മുന്നറിയിപ്പ് നൽകിയത്.
കഴിഞ്ഞ ദിവസം ഒരു പോലീസുദ്യോഗസ്ഥനും മറ്റ് ആറ്പേർക്കും ചാവേർ ആക്രമത്തിൽ പരിക്കേറ്റിരുന്നു. ഇതുമായി ബന്ധപ്പെട്ട വിശദവിവരങ്ങളുടെ അന്വേഷണത്തെ തുടർന്നാണ് മുന്നറിയിപ്പ് ശക്തമാക്കിയത്. മാരിയറ്റ് ഹോട്ടലിനെ ഭീകരർ ലക്ഷ്യംവയ്ക്കുന്നുവെന്ന് അമേരിക്കൻ രഹസ്യാന്വേഷണ വിഭാഗം എടുത്തുപറഞ്ഞിരിക്കുകയാണ്. ഒപ്പം പാകിസ്താ നിലെ ഇസ്ലാമാബാദ്, ലാഹോർ, കറാച്ചി എന്നീ സുപ്രധാന നഗരകേന്ദ്രങ്ങളെല്ലാം റെഡ് അലർട്ടിലാണ് പെടുത്തിയിരിക്കുന്നത്.
