സൂപ്പർമാർക്കറ്റിൽ മോഷണം നടത്തി കടന്നുകളയാൻ ശ്രമിച്ച കള്ളന് വിനയായി തീർന്ന് അതിശൈത്യം. ജോർജിയയിലെ ഒരു കടയിൽ നിന്ന് മോഷണം നടത്തി രക്ഷപ്പെടാൻ ശ്രമിക്കുന്നതിനിടെയാണ് കള്ളനെ ‘ഐസ്’ വീഴ്ത്തിയത്. 30-കാരനായ ലൂയിസ് സജ്ബോച്ചോ-ഓർഡോനെസ് ഇതോടെ പോലീസിന്റെ പിടിയിലാകുകയായിരുന്നു. ക്രിസ്തുമസ് ദിവസം അർദ്ധരാത്രി ഒരു മണിയോടെയാണ് സംഭവം നടന്നത്.
ആയുധങ്ങളുമായാണ് കള്ളൻ കടയിലേക്ക് എത്തിയത്. ജീവനക്കാർക്ക് നേരെ തോക്കുചൂണ്ടിയ കള്ളൻ അവരെ കൊല്ലുമെന്ന് ഭീഷണിപ്പെടുത്തി സാധനങ്ങൾ കവർന്നു. ഇതിനിടെ കടയിലെ ജീവനക്കാരൻ കള്ളനെ കായികമായി നേരിടാൻ ശ്രമിച്ചെങ്കിലും മോഷ്ടിച്ചെടുത്ത സാധനങ്ങളുമായി കള്ളൻ പുറത്തേക്കിറങ്ങിയോടി. എന്നാൽ ശൈത്യത്തെ തുടർന്ന് നിലത്ത് രൂപപ്പെട്ട മഞ്ഞിൽ തെന്നി കള്ളൻ വീഴുകയായിരുന്നു.
ഐസിൽ മുഖമിടിച്ചായിരുന്നു കള്ളൻ വീണത്. പരിക്കേറ്റ ഇയാൾക്ക് വീണ്ടും ഓടാനുള്ള കരുത്തില്ലായിരുന്നു. കടയിലെ ജീവനക്കാരെത്തി കള്ളന്റെ കൈകളിൽ നിന്നും തോക്ക് തട്ടിപ്പറിച്ചുവാങ്ങി. വൈകാതെ പോലീസ് എത്തുകയും കള്ളനെ പിടികൂടുകയും ചെയ്തു.
കള്ളന്റെ പരിക്ക് ഗുരുതരമല്ലാത്തതിനാൽ ഇയാളെ അറസ്റ്റ് ചെയ്ത് കസ്റ്റഡിയിൽ വച്ചിരിക്കുകയാണെന്ന് പോലീസ് അറിയിച്ചു. 1990ൽ പുറത്തിറങ്ങിയ ഹോം എലോൺ എന്ന ഇംഗ്ലീഷ് സിനിമയിലെ കഥാപാത്രത്തോടാണ് പോലീസ് കള്ളനെ ഉപമിച്ചത്. ക്രിസ്മസ് സമയത്ത് വീടിനകത്തേക്ക് അതിക്രമിച്ച് കയറാൻ ശ്രമിക്കുന്ന സിനിമയിലെ കഥാപാത്രം ഐസിൽ മുഖമടിച്ച് വീഴുന്ന രംഗമാണ് കള്ളൻ ഓർമ്മിപ്പിച്ചതെന്നും പോലീസ് പ്രതികരിച്ചു.
Comments