ന്യൂഡല്‍ഹി: രാജ്യത്തിന്റെ അഖണ്ഡതയ്‌ക്കും ഐക്യത്തിനുമെതിരെ പ്രചാരണം നടത്തുന്നവര്‍ക്കെതിരെ ശക്തമായ നടപടി സ്വീകരിക്കുമെന്ന് കേന്ദ്ര വാര്‍ത്ത പ്രക്ഷേപണ വകുപ്പ് സഹമന്ത്രി എല്‍. മുരുകന്‍. സമൂഹ മാദ്ധ്യമങ്ങള്‍ വഴിയുള്ള ഇത്തരം പ്രചരണങ്ങള്‍ക്ക് തടയിടും. നിരവധി സാമൂഹിക മാദ്ധ്യമ അക്കൗണ്ടുകള്‍ക്കെതിരെ ഇതിനോടകം നടപടി സ്വീകരിച്ചതായും അദ്ദേഹം വ്യക്തമാക്കി.
ഓണ്‍ലൈന്‍ മാദ്ധ്യമങ്ങള്‍ക്ക് നിയന്ത്രണം ഏര്‍പ്പെടുത്തണമെന്ന ആവശ്യം ഉയര്‍ന്നുവന്നാല്‍ വിഷയം പരിഗണിക്കുമെന്നും മന്ത്രി വ്യക്തമാക്കി. വ്യാജ വാര്‍ത്ത പ്രചരിപ്പിച്ച 300ല്‍ അധികം യൂട്യൂബ് ചാനലുകള്‍ക്ക് ഇത്തരത്തില്‍ നിയന്ത്രണം ഏര്‍പ്പെടുത്തിയിരുന്നതായും അദ്ദേഹം ചൂണ്ടിക്കാട്ടി. കൊച്ചിയില്‍ മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം.
പാകിസ്താന്‍ കേന്ദ്രമാക്കി പ്രവര്‍ത്തിക്കുന്ന ചില യൂട്യൂബ് ചാനലുകള്‍ക്കെതിരേയും സര്‍ക്കാര്‍ നടപടി സ്വീകരിച്ചിരുന്നു. പൗരത്വ നിയമം, കശ്മീര്‍ വിഷയം എന്നിവയില്‍ തെറ്റായ വിവരങ്ങള്‍ നല്‍കിയതിന്റെ അടിസ്ഥാനത്തിലായിരുന്നു നടപടി. തെറ്റായ വാര്‍ത്ത പ്രചരിപ്പിച്ചതിന് മൂന്ന് പ്രമുഖ ഇന്ത്യന്‍ യൂട്യൂബ് ചാനലുകള്‍ക്കെതിരേയും കഴിഞ്ഞ ആഴ്ച കേന്ദ്രം നടപടി സ്വീകരിച്ചിരുന്നു.
വ്യാജ വാര്‍ത്ത പ്രചരിപ്പിക്കുന്നത് തടയാന്‍ ശക്തമായ നടപടികളാണ് കേന്ദ്രം കൈക്കൊള്ളുന്നത്. ശക്തമായ ഫാക്ട് ചെക്കിംഗ് സംവിധാനവും പ്രസ് ഇന്‍ഫര്‍മേഷന്‍ ബ്യൂറോയ്‌ക്ക് കീഴില്‍ പ്രവര്‍ത്തിക്കുന്നുണ്ട്.
