കോഴിക്കോട്: മന്ത്രി മുഹമ്മദ് റിയാസിനെതിരെ കലോത്സവ സ്വാഗതഗാനം അവതരിപ്പിച്ച കലാസംഘം. പരിപാടി കഴിഞ്ഞ ഉടന് വന്ന് അഭിനന്ദനം അറിയിച്ചയാളാണ് മന്ത്രി. എന്നാല് സംഭവം വിവാദമായപ്പോള് അദ്ദേഹം തള്ളിപ്പറയുകയായിരുന്നുവെന്ന് മാത കാലാസംഘം ഡയറക്ടര് കനകലാല് ആരോപിച്ചു.
കലോത്സവത്തിലെ സ്വാഗത ഗാനത്തെച്ചൊല്ലിയുള്ള വിവാദങ്ങള് അസംബന്ധമാണെന്ന് കനകലാല് പറഞ്ഞു. കലാസംഘത്തിന് രാഷ്ട്രീയ ബന്ധമുണ്ടെന്ന തരത്തിലുള്ള വാര്ത്ത വാസ്തവ വിരുദ്ധമാണെന്നും അദ്ദേഹം വ്യക്തമാക്കി.
സ്കൂള് കലോത്സവത്തിന്റെ സ്വാഗത ഗാനം സംബന്ധിച്ച് പരിശോധന നടത്തണമെന്ന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് കഴിഞ്ഞദിവസം ആവശ്യപ്പെട്ടിരുന്നു. സ്വാഗത ഗാനം തയ്യാറാക്കുന്നതില് പങ്കാളികളായവരുടെ താല്പര്യം പരിശോധിക്കണം. പിന്നണി പ്രവര്ത്തകരുടെ സംഘപരിവാര് ബന്ധം അന്വേഷിക്കണമെന്നുമായിരുന്നു മന്ത്രിയുടെ ആവശ്യം.
സ്വാഗത ഗാനത്തില് തീവ്രവാദിയായി എത്തിയ കഥാപാത്രം അറബി വേഷം ധരിച്ചെത്തിയതിനെതിരെ മുസ്ലീം ലീഗ് രംഗത്തുവന്നിരുന്നു. ഇതിന് പിന്നാലെയായിരുന്നു മന്ത്രിയുടെ പ്രതികരണം. സ്വാഗത ഗാനത്തിനെതിരെ സിപിഎം കോഴിക്കോട് ജില്ല കമ്മിറ്റിയും പ്രസ്താവന പുറത്തിറക്കിയിട്ടുണ്ട്.
Comments