ഇന്ത്യൻ എസ്‌യുവി വിപണിയിലെ തലതൊട്ടപ്പനായിരുന്നു ടാറ്റ സിയറ. ഇന്ത്യയിൽ വികസിപ്പിച്ച് നിർമ്മിച്ച ആദ്യ എസ്‍യുവിയായ സിയറയുടെ നിർമ്മാണം 2000-ലാണ് ടാറ്റ അവസാനിപ്പിച്ചത്. നിരവധി ആരാധകരാണ് സിയറയ്‌ക്കുള്ളത്. ഇപ്പോഴിതാ, ടാറ്റ സിയറ തിരിച്ചു വരാൻ ഒരുങ്ങുകയാണ്. 2020 ഓട്ടോ എക്സ്പോയിൽ പ്രദർശിപ്പിച്ച വാഹനത്തിന്റെ പ്രൊഡക്ഷൻ മോഡലിനോട് അടുത്തു നിൽക്കുന്ന പതിപ്പാണ് 2023 ഡൽഹി ഓട്ടോ എക്സ്പോയിൽ ടാറ്റ അവതരിപ്പിച്ചത്.
2020 മോഡലിന് സൂയിസൈഡ് ഡോറുകളായിരുന്നെങ്കിൽ ഇപ്പോൾ അവതരിപ്പിച്ച മോഡലിന് സാധാരണ ഡോറുകളാണ്.1991–ൽ പുറത്തിറങ്ങിയ സിയറയുമായി സാമ്യമുള്ള ഡിസൈനോടെയാണ് ഇ–സിയറയുടെ കൺസെപ്റ്റ് ടാറ്റ ഒരുക്കിയിരിക്കുന്നത്.
ആൾട്രോസ് നിർമ്മിച്ചിരിക്കുന്ന ആൽഫാ പ്ലാറ്റ്ഫോമിൽ തന്നെയാണ് പുതിയ സിയറയുടെയും നിർമാണമെന്നാണ് സൂചന. സിയറയുടെ മറ്റു സാങ്കേതിക വിവരങ്ങൾ ടാറ്റ പുറത്തുവിട്ടില്ല. 2025-ൽ പുതിയ വാഹനം വിപണിയിലെത്തുമെന്നാണ് ടാറ്റ അറിയിക്കുന്നത്. ഇലക്ട്രിക് പതിപ്പ് കൂടാതെ പെട്രോൾ എൻജിനുമായി വാഹനം എത്തിയേക്കും.
