വെല്ലുവിളികളെ സധൈര്യം നേരിട്ട പോരാളിയാണ് പ്രിയനടി മംമ്താ മോഹൻദാസ്. അർബുദത്തിൽ നിന്നും ജീവിതത്തിലേക്ക് തിരികെയെത്തിയ മംമ്ത, തികഞ്ഞ ആത്മവിശ്വാസത്തിലാണ് അത് സാധ്യമാക്കിയത്. അർബുദത്തോട് പൊരുതിയതും പ്രതിസന്ധിഘട്ടങ്ങളെ തരണം ചെയ്തതും നടി തുറന്ന് പറഞ്ഞിട്ടുണ്ട്. ഇരുപതുകളിൽ പുഞ്ചിരിയോടെ അർബുദത്തെ നേരിട്ട മംമ്ത നിരവധി പേരുടെ പ്രചോദനമാണ്.
എന്നാൽ ഇപ്പോൾ വീണ്ടുമൊരു പ്രതിസന്ധി ഘട്ടത്തിലൂടെ കടന്നുപോവുകയാണ് താരം. ഒരു കപ്പ് കാപ്പിയുമായി, മേക്കപ്പ് തുടച്ചു മാറ്റിയ മുഖത്തോടുകൂടിയുള്ള സെൽഫിയാണ് അവർ ഇൻസ്റ്റഗ്രാമിൽ പങ്കുവെച്ചിരിക്കുന്നത്. സൂര്യനോട് സംസാരിക്കുന്നത് പോലെയാണ് മംമ്ത ചിത്രത്തിന് അടിക്കുറിപ്പ് എഴുതിയിരിക്കുന്നത്.
‘പ്രിയപ്പെട്ട സൂര്യൻ, മുൻപ് എങ്ങുമില്ലാത്ത വിധം ഞാൻ ഇപ്പോൾ നിന്നെ സ്വീകരിക്കുന്നു… എനിക്ക് നിറം നഷ്ടപ്പെടുന്നു എന്ന് കണ്ടെത്തിയിരിക്കുന്നു… മൂടൽമഞ്ഞിലൂടെ നിന്റെ ആദ്യ കിരണങ്ങൾ മിന്നിമറയുന്നത് കാണാൻ നിന്നേക്കാൾ നേരത്തെ എല്ലാ ദിവസവും ഞാൻ എഴുന്നേൽക്കും. നിനക്കുള്ളതെല്ലാം തരൂ.. നിന്റെ അനുഗ്രഹത്താൽ ഇന്നുമുതൽ എന്നും ഞാൻ കടപ്പെട്ടവളായിരിക്കും’- എന്നാണ് താരം പോസ്റ്റിൽ കുറിച്ചത്. മംമ്ത കരുത്തോടെ മറ്റൊരു രോഗാവസ്ഥയെ തരണം ചെയ്യുന്നതായാണ് കുറിപ്പിൽ പറയുന്നത്.
ശരീരത്തിന്റെ രോഗപ്രതിരോധ സംവിധാനത്തെ ബാധിക്കുന്ന അവസ്ഥയായ ഓട്ടോ ഇമ്യൂണൽ ഡിസോർഡർ അഥവ വിറ്റിലിഗോ എന്നറിയപ്പെടുന്ന വെള്ളപ്പാണ്ട് എന്ന ത്വക്ക് രോഗം. രോഗത്തെ അതിജീവിക്കാനുള്ള ശ്രമത്തിലാണ് താരം. അതിനാൽ തൊലിപ്പുറത്തെ യഥാർത്ഥ അവസ്ഥ യാതൊരു മറയും കൂടാതെ അവതരിപ്പിക്കുകയാണ് നടി.
രോഗം വഴി പ്രതിരോധ സംവിധാനത്തിന് നമ്മുടെ സ്വന്തം കോശങ്ങളെ തിരിച്ചറിയാൻ കഴിയാത്ത അവസ്ഥ വരുന്നു. മെലാനിന്റെ കുറവു മൂലം ഇവ ബാധിക്കാം. അതിനാലാണ് പതിവായി ഇനി സൂര്യപ്രകാശം ഏൽക്കുമെന്ന് മംമ്ത കുറിപ്പിൽ പങ്കുവച്ചത്. വിറ്റിലിഗോ, ഓട്ടോ ഇമ്യൂണൽ ഡിസോർഡർ തുടങ്ങിയ ഹാഷ്ടാഗുകളും മംമ്തയുടെ പോസ്റ്റിനൊപ്പമുണ്ട്.
നിരവധി പേരാണ് മംമ്തയുടെ പോസ്റ്റിന് കമൻറുകളുമായി രംഗത്തെത്തിയത്. ആത്മവിശ്വാസത്തോടെ എല്ലാ പ്രതിസന്ധികളേയും നേരിടണം എന്നാണ് ആരാധകർ താരത്തിനോട് പറയുന്നത്. എത്രയും പെട്ടെന്ന് രോഗത്തിൽ നിന്നും മംമ്ത മുക്തി നേടട്ടെ എന്നും ആരാധകർ ആശംസിച്ചു. ആസിഫ് അലി നായകനാകുന്ന ‘ മഹേഷും മാരുതിയും’ എന്ന സിനിമയാണ് മംമ്തയുടെ പുറത്തിറങ്ങാനുള്ള പുതിയ ചിത്രം. സേതുവാണ് ചിത്രത്തിന്റെ രചനയും സംവിധാനവും നിർവഹിക്കുന്നത്.
