കേരളത്തിന് പുറത്തായിരുന്നുവെങ്കിൽ പുരോഗമന സിംഹങ്ങൾ കാണിച്ചു തന്നേനെ; ഇതിപ്പോൾ കെ.ആർ നാരായണൻ ഇൻസ്റ്റിറ്റ്യൂട്ട് കേരളത്തിന് അകത്തായി പോയി: ഡോ.ബിജു

കോട്ടയം: കെആർ നാരയണൻ ഇൻസ്റ്റിറ്റ്യൂട്ടിൽ നടക്കുന്ന സമരം കണ്ടില്ലെന്ന് നടിക്കുന്ന ഇടതുപക്ഷ സർക്കാരിനെയും സാംസ്കാരിക നായകരെയും വിമർശിച്ച് സംവിധായകൻ ഡോ. ബിജു. സർക്കാർ ഫിലിം ഇൻസ്റ്റിറ്റ്യൂട്ടിൽ ഡയറക്ടർ സംവരണ സീറ്റിൽ അർഹമായ നിയമനം നടക്കുന്നില്ല, ദളിതരെ കൊണ്ട് സ്വന്തം വീട്ടിലെ ടോയിലറ്റ് വൃത്തിയാക്കിക്കുകയും അവരോട് ജാതി വിവേചനം പുലർത്തുകയും ചെയ്യുന്നു, വിദ്യാർത്ഥികളോട് ജാതീയമായ വേർതിരിവ് കാണിന്നു. എന്നിട്ടും കേരളത്തിലെ പുരോ​ഗമന സിംഹങ്ങൾ പ്രതികരിക്കുന്നില്ലെന്ന് ബിജു വിമർശിച്ചു.

കേരളത്തിന് പുറത്തായിരുന്നുവെങ്കിൽ പുരോഗമന കേരളത്തിന്റെ പ്രതികരണം കാണിച്ചു തന്നേനെ. ഇതിപ്പോൾ കെ.ആർ നാരായണൻ ഫിലിം ഇൻസ്റ്റിറ്റ്യൂട്ട് കേരളത്തിലായി പോയി. ചെയർമാനും ഡയറക്ടർക്കുമെതിരെ വിദ്യാർത്ഥികളും ചില സിനിമാ പ്രവർത്തകരും പ്രതികരിക്കുമ്പോൾ ചെയർമാൻ വലിയ ഫിലിം മേക്കർ ആയതു കൊണ്ട് പ്രതികരിക്കാൻ പാടില്ല എന്നാണ് ഭരണ കക്ഷി നേതാക്കൾ പറയുന്നത് എന്നും ബിജു ഫേയ്സ്ബുക്കിൽ കുറിച്ചു.

ഡോ.ബിജുവിന്റെ ഫേയ്സ്ബുക്ക് പോസ്റ്റ്,

നമ്മൾ വെറുതെ ഒന്നാലോചിച്ചു നോക്കൂ…കേരളത്തിന് പുറത്തുള്ള ഒരു സംസ്ഥാനം. അവിടുത്തെ ഒരു സർക്കാർ ഫിലിം ഇൻസ്റ്റിറ്റ്യൂട്ടിൽ ഡയറക്ടർ സംവരണ സീറ്റിൽ അർഹമായ നിയമനം നടത്താതിരിക്കുക, ദളിത് ശുചീകരണ തൊഴിലാളികളെ കൊണ്ട് സ്വന്തം വീട്ടിലെ ടോയിലറ്റ് വൃത്തിയാക്കിക്കുകയും അവരോട് ജാതി വിവേചനം പുലർത്തുകയും ചെയ്യുക, വിദ്യാർത്ഥികളോട് ജാതീയമായ വേർതിരിവ് കാണിക്കുക എന്നീ ആരോപണങ്ങൾ ഉയരുന്നു…ഈ വിഷയങ്ങൾ ചൂണ്ടിക്കാട്ടി വിദ്യാർത്ഥികൾ സമരത്തിനിറങ്ങുന്നു. സമരം ചെയ്യുന്ന വിദ്യാർത്ഥികളെയും ശുചീകരണ തൊഴിലാളികളെയും ഇൻസ്റ്റിറ്റ്യൂട്ടിന്റെ ചെയർമാൻ മാദ്ധ്യമങ്ങളിലൂടെ അധിക്ഷേപിക്കുന്നു. ശുചീകരണ തൊഴിലാളികൾ ആയ ദളിത് സ്ത്രീകൾ ഉടുത്തൊരുങ്ങി സ്റ്റാറാവാൻ നടക്കുന്ന സ്ത്രീകൾ ആണെന്ന് അധിക്ഷേപിക്കുക. ചെയർമാനും ഡയറക്ടർക്കുമെതിരെ വിദ്യാർത്ഥികളും ചില സിനിമാ പ്രവർത്തകരും പ്രതികരിക്കുമ്പോൾ ചെയർമാൻ വലിയ ഫിലിം മേക്കർ ആയതു കൊണ്ട് പ്രതികരിക്കാൻ പാടില്ല എന്ന് ഭരണ കക്ഷി നേതാക്കൾ തന്നെ രംഗത്തു വരിക. ജാതി വിവേചനത്തിനും സംവരണ തത്വം അട്ടിമറിച്ചതിനും എതിരായി വിദ്യാർത്ഥി സമരം 45 ദിവസം പിന്നിടുക….
ഇതൊക്കെ സംഭവിച്ചത് കേരളത്തിന് പുറത്തായിരുന്നുവെങ്കിൽ എന്തായിരുന്നേനെ ഇവിടുത്തെ പ്രതികരണങ്ങൾ, പ്രതിഷേധങ്ങൾ, സമരങ്ങൾ. പുരോഗമന കേരളത്തിന്റെ പ്രതികരണം ഞങ്ങൾ കാണിച്ചു തന്നേനെ… ഇതിപ്പോൾ കെ.ആർ നാരായണൻ ഫിലിം ഇൻസ്റ്റിറ്റ്യൂട്ട് കേരളത്തിൽ ആയി പോയി. അതുകൊണ്ട് പോട്ടേ…നിങ്ങൾ ഇട്ടാൽ അത് കളസം ആണ്. പക്ഷെ ഞങ്ങളിട്ടാൽ അത് ബർമുഡ ആണ്…. ഞങ്ങൾ അത്രയ്‌ക്കും പുരോഗമന സിംഹങ്ങൾ ആണ് കേട്ടോ.