മലയാള സിനിമയിലെ ഏറ്റവും വലിയ വിജയങ്ങളിലൊന്നായി മാറുകയാണ് ഉണ്ണി മുകുന്ദൻ നായകനായ മാളികപ്പുറം. ചിത്രത്തിന്റെ അപ്രതീക്ഷിതമായ വലിയ വിജയം ആഘോഷമാക്കുകയാണ് സിനിമാ പ്രേമികളും ആരാധകരും. ഇപ്പോഴിതാ, ഉണ്ണി മുകുന്ദന്റെ 75 അടി ഉയരമുള്ള കട്ടൗട്ട് സ്ഥാപിക്കാനൊരുങ്ങുകയാണ് താരത്തിന്റെ ആരാധകർ. പാലക്കാട് പ്രിയദർശിനി തിയേറ്ററിൽ ജനുവരി 20(ഇന്ന്) വൈകുന്നേരം അഞ്ചു മണിക്ക് കട്ടൗട്ട് ഉയർത്തും. തുടർന്ന് പ്രേക്ഷകർക്കൊപ്പം മാളികപ്പുറത്തിന്റെ വിജയം ആഘോഷിക്കുമെന്നും ഓൾ കേരളാ ഉണ്ണി മുകുന്ദൻ ഫാൻസ് ആന്റ് വെൽഫെയർ അസോസിഷേയൻ അറിയിച്ചു.
അതേസമയം, 145 തിയേറ്ററുകളിൽ റിലീസ് ചെയ്ത ചിത്രം കേരളത്തിലെ 230 ലധികം തിയേറ്ററുകളിലേയ്ക്ക് വ്യാപിച്ചിരിക്കുകയാണ്. എങ്ങും ഹൗസ്ഫുൾ ഷോകളാണ് ചിത്രത്തിന് ലഭിക്കുന്നത്. വളരെ അപൂർവ്വമായാണ് മലയാള സിനിമയിൽ ഇത്തരമൊരു വിജയം ലഭിക്കുന്നത്. സിനിമയുടെ തമിഴ്, തെലുങ്ക്, കന്നഡ പതിപ്പുകളും ഉടൻ റീലീസ് ചെയ്യും. ഒരു പാൻ ഇന്ത്യൻ ചിത്രമായി ഹൃദയം കീഴടക്കാൻ ഒരുങ്ങുകയാണ് മാളികപ്പുറം.
നടൻ അല്ലു അർജ്ജുന്റെ നിർമ്മാണ കമ്പനിയായ ഗീതാ ആർട്സ് ആണ് മാളികപ്പുറത്തിന്റെ തെലുങ്ക് ഡബ്ബഡ് പതിപ്പ് തിയറ്റുകളിലേയ്ക്ക് എത്തിക്കുന്നത്. രാക്ഷസൻ, വിക്രംവേദ തുടങ്ങിയ ബ്ലോക്ക് ബസ്റ്ററുകൾ ജനങ്ങളിലേയ്ക്ക് എത്തിച്ച ട്രൈഡന്റ് ആർട്ട്സ് ആണ് മാളികപ്പുറം തമിഴ് നാട്ടിൽ ഇറക്കുന്നത്. സിനിമ ഇതിനോടകം 40 കോടി ക്ലബിൽ ഇടം നേടിയിട്ടുണ്ട്. ഉണ്ണി മുകുന്ദന്റെ ആദ്യ നൂറ് കോടി ചിത്രമായി മാളികപ്പുറം മാറും എന്ന പ്രതീക്ഷയിലാണ് മലയാള സിനിമാ ലോകം.
