കൊച്ചി: നടി അപർണ ബാലമുരളിയോട് മോശമായി പെരുമാറിയ എറണാകുളം ലോ കോളജ് വിദ്യാർത്ഥിക്ക് സസ്പെൻഷൻ. ഒരാഴ്ചത്തേക്കാണ് ഇയാൾക്ക് സസ്പെൻഷൻ. എറണാകുളം ലോ കോളേജ് സ്റ്റാഫ് കൗൺസിലാണ് നടപടി കൈക്കൊണ്ടിരിക്കുന്നത്. സ്വാഗതം ചെയ്യുന്നതിനായി വേദിയിൽ എത്തിയപ്പോഴായിരുന്നു നടിയോട് വിദ്യാർത്ഥി അപമര്യാദയാ പെരുമാറിയത്.
പൂവ് നൽകുന്നതിനായി സ്റ്റേജിലേക്ക് കയറിയ വിദ്യാർത്ഥി താരത്തിന്റെ കയ്യിൽ പിടിച്ച് വലിക്കുകയും തോളിൽ കയ്യിടുകയും ചെയ്തു. ഇതിന്റെ വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെ വിദ്യാർത്ഥിക്കെതിരെ നടപടി വേണമെന്ന് ആവശ്യം ഉയർന്നിരുന്നു. സംഭവത്തിൽ യൂണിയന്റെ ഭാഗത്ത് നിന്നും ഖേദം അറിയിച്ചിരുന്നു.
ഈ സംഭവവുമായി ബന്ധപ്പെട്ട് താരത്തിന് ഉണ്ടായ പ്രയാസത്തിൽ കോളേജ് യൂണിയൻ നിർവ്യാജം ഖേദം പ്രകടിപ്പിക്കുന്നു എന്നും ഇത്തരമൊരു വിഷയത്തെ ഏറെ ഗൗരവത്തോടെയാണ് നോക്കി കാണുന്നതെന്നും കോളേജ് യൂണിയൻ പുറത്തിറക്കിയ പ്രസ്താവനയിൽ വ്യക്തമാക്കി. യൂണിയൻ ഉദ്ഘാടനത്തോടൊപ്പം തങ്കം സിനിമയുടെ പ്രമോഷന്റെ ഭാഗമായി കൂടിയാണ് അപർണ ലോ കോളേജിൽ എത്തിയത്. നടൻ വിനീത് ശ്രീനിവാസൻ, സംഗീത സംവിധായകൻ ബിജിപാൽ എന്നിവരും നടിക്ക് ഒപ്പം വേദിയിൽ ഉണ്ടായിരുന്നു.
Comments