ബാംഗ്ലൂർ : വാക്ക് തർക്കത്തിനിടെ കാറിന്റെ ബോണറ്റിൽ വീണ യുവാവിനെ ഒരു കിലോമീറ്റേറോളം വലിച്ചിഴച്ച് യുവതി. ബാംഗ്ലൂർ ജ്ഞാന ഭാരതി നഗറിലാണ് സംഭവം. കാറുകൾ തമ്മിൽ കൂട്ടിയിടിച്ചതിനെ തുടർന്നുണ്ടായ വാക്ക് തർക്കത്തിനിടെയാണ് ദർശൻ എന്ന യുവാവിനെ ഒരു കിലോമീറ്റേറോളം യുവതി വലിച്ചിഴച്ചത്.
തർക്കം രൂക്ഷമായതോടെ യുവതി ദർശന്റെ സമീപത്തേക്ക് കാർ എടുക്കുകയും തുടർന്ന് കാറിന്റെ ബോണറ്റിൽ വഴുതി വീണ ദർശനെ ഒരു കിലോ മീറ്ററോളം യുവതി വലിച്ചിഴക്കുകയുമായിരുന്നു.
ദർശൻ വണ്ടി നിർത്താൻ നിരവധി തവണ ആവശ്യപ്പെട്ടെങ്കിലും യുവതി കേൾക്കാൻ കൂട്ടാക്കിയില്ല. ഒടുവിൽ ദർശൻ ഡ്രൈവിങ് തടസ്സപ്പെടുത്തിയതിനെ തുടർന്നാണ് യുവതി വാഹനം നിർത്തിയത്. തുടർന്ന് ബോണറ്റിൽ നിന്ന് ചാടിയിറങ്ങിയ ദർശൻ സുഹൃത്തുകൾക്കൊപ്പം യുവതിയുടെ കാർ തല്ലി തകർത്തു.
പ്രിയങ്ക എന്ന യുവതിയാണ് കാർ ഓടിച്ചിതെന്ന് പോലീസ് കണ്ടെത്തിയിട്ടുണ്ട്. ഇവർക്കെതിരെ 307 വകുപ്പ് പ്രകാരം എഫ്ഐആർ രജിസ്റ്റർ ചെയ്തിട്ടുണ്ട്. കൂടാതെ ദർശനും സുഹൃത്തുക്കൾക്കുമെതിരെ സ്ത്രീക്കെതിരെയുള്ള മര്യാദലംഘനത്തിനും കേസെടുത്തതായി ഡിസിപി അറിയിച്ചു.
