ന്യൂഡൽഹി: ഭാരത് ബയോടെക്കിന്റെ മൂക്കിലൂടെ നൽകുന്ന വാക്സിനായ iNCOVACC ഇനി മുതൽ പൊതുജനങ്ങൾക്ക് ലഭ്യമാകും. റിപ്പബ്ലിക് ദിനത്തിൽ കേന്ദ്ര ആരോഗ്യമന്ത്രി മൻസൂഖ് മാണ്ഡവ്യയും ശാസ്ത്ര സാങ്കേതിക മന്ത്രി ജിതേന്ദ്ര സിംഗും ചേർന്ന് ഇന്ത്യയിലെ ആദ്യ നേസൽ വാക്സിൻ രാജ്യത്തിനായി സമർപ്പിച്ചു. കൊറോണയ്ക്കെതിരായി തദ്ദേശീയമായി നിർമ്മിക്കുന്ന ആദ്യ നേസൽ വാക്സിനാണിതെന്ന പ്രത്യേകതയും iNCOVACCനുണ്ട്.
സ്വകാര്യ ആശുപത്രികളിൽ 800 രൂപയ്ക്കും സർക്കാർ കേന്ദ്രങ്ങളിൽ 325 രൂപ നിരക്കിലും വാക്സിൻ ലഭ്യമാകും. ആദ്യ ഘട്ടത്തിൽ സ്വകാര്യ ആശുപത്രികളിലാണ് വാക്സിൻ വിതരണം ചെയ്യുക. ബൂസ്റ്റർ വാക്സിനായും iNCOVACC ഉപയോഗിക്കാവുന്നതാണ്. കൊവിൻ ആപ്പ് മുഖേന വാക്സിൻ ബുക്ക് ചെയ്യാം.
2022 നവംബറിലായിരുന്നു ഡിജിസിഐയുടെ അനുമതി iNCOVACCന് ലഭിച്ചത്. 18 വയസിന് മുകളിലുള്ളവർക്കാണ് വാക്സിൻ ഉപയോഗിക്കാനാവുക. ചൈനയുൾപ്പെടെ പല രാജ്യങ്ങളിലും കൊറോണ വ്യാപനം രൂക്ഷമായതിന്റെ പശ്ചാത്തലത്തിൽ കൂടിയാണ് മൂക്കിലൂടെ നൽകുന്ന വാക്സിൻ ഇന്ത്യയിൽ അവതരിപ്പിച്ചിരിക്കുന്നത്
