ന്യൂഡല്ഹി: കാശ്മീര് യുവാക്കളുടെ കായിക മികവിനെ പ്രശംസിച്ച് പ്രധാനമന്ത്രി നരേന്ദ്ര മോദി. ഈ വര്ഷത്തെ ആദ്യത്തെ മന്കി ബാത്ത് പരിപാടിയില് ജനങ്ങളോട് സംസാരിക്കുകയായിരുന്നു അദ്ദേഹം. സെയ്യദാബാദില് സംഘടിപ്പിച്ച വിന്റര് ഗെയിംസിലൂടെ മികച്ച ഒരുപിടി കായികതാരങ്ങളെ കണ്ടെത്താനായെന്നും അദ്ദേഹം പറഞ്ഞു. വിന്റര് ഗയിംസിന്റെ ഭാഗമായി നടന്ന സ്നോ ക്രിക്കറ്റിലൂടെയാണ് ശൈത്യത്തിലും ഇത്ര മനോഹരമായി ക്രിക്കറ്റ് കളിക്കാമെന്ന് മനസ്സിലായതെന്ന് അദ്ദേഹം പറഞ്ഞു.
സ്നോ ക്രിക്കറ്റ് ഖേലോ ഇന്ത്യ പ്രസ്താനത്തിന്റെ ഭാഗമാണെന്നും അദ്ദേഹം പറഞ്ഞു. കശ്മീരി യുവാക്കള് മഞ്ഞില് ക്രിക്കറ്റിനെ വിസ്മയമാക്കി മാറ്റിയെന്നും ഇതിലൂടെ ഇന്ത്യന് ക്രിക്കറ്റിലേക്ക് മികച്ച താരങ്ങളെ കണ്ടെത്താനാകുമെന്നും അദ്ദേഹം കൂട്ടിച്ചേര്ത്തു. കശ്മീര് യുവാക്കള്ക്ക് കായികരംഗത്തോടുള്ള അഭിനിവേശം എടുത്തുപറയേണ്ടതാണ്. ഭാവിയില് കശ്മീര് താരങ്ങള് രാജ്യത്തിനായി നിരവധി മെഡലുകള് നടുമെന്നും അന്താരാഷ്ട്ര വേദികളില് ത്രിവര്ണ്ണ പതാക പാറിക്കുമെന്നും അദ്ദേഹം പറഞ്ഞു.
കുറച്ചുകാലമായി കശ്മീരില് നിന്നും മികച്ച ക്രിക്കറ്റ് താരങ്ങള് ഉയര്ന്ന് വന്നുകൊണ്ടിരിക്കുന്നു. അതില് ഏറ്റവും മികവുറ്റ താരമാണ് ഫാസ്റ്റ് ബൗളറായ ഉമ്രാന് മാലിക്. 23 വയസ്സുകാരനായ ആ ചെറുപ്പക്കാരന് അറിയപ്പെടുന്നത് ‘ജമ്മു എക്സ്പ്രസ്സ്’ എന്നാണെന്നും അദ്ദേഹം പറഞ്ഞു. ഉമ്രാന് ചുരുങ്ങിയ കാലംകൊണ്ട് ഒരുപാട് അംഗീകാരങ്ങള് നേടിയെടുത്തു. 2022 ല് നടന്ന ഇന്ത്യന് പ്രിമിയര് ലീഗില് 14 മത്സരങ്ങളില്നിന്ന് 22 വിക്കറ്റുകള് നേടി മികച്ച ഫാസ്റ്റ് ബൗളര്മാരുടെ പട്ടികയില് ഇടം നേടാന് കഴിഞ്ഞെന്നും പ്രധാനമന്ത്രി കൂട്ടിച്ചേര്ത്തു.
കശ്മീരിലേക്ക് ഒരു യാത്രക്ക് തയ്യാറെടുക്കുമ്പോള് തീര്ച്ചയായും കശ്മീരിലെ കായികമത്സരങ്ങള് കാണാന് സമയം കണ്ടെത്തണമെന്നും അദ്ദേഹം അഭ്യര്ത്ഥിച്ചു. അത്തരം അനുഭവങ്ങള് യാത്രയെ കൂടുതല് മനോഹരമാക്കുമെന്നും അദ്ദേഹം കൂട്ടിച്ചേര്ത്തു.
