ന്യൂഡൽഹി: വ്യോമഗതാഗത മേഖലയെ കൂടുതൽ കാര്യക്ഷമമാക്കാൻ 2023-ലെ കേന്ദ്രബജറ്റിൽ നിർണായക പ്രഖ്യാപനങ്ങൾ. പുതിയ വിമാനത്താവളങ്ങളും വാട്ടർ-എയ്റോ ഡ്രോണുകളും അടക്കം നിരവധി നൂതന സംവിധാനങ്ങൾ നിലവിൽ വരുമെന്ന് ധനമന്ത്രി നിർമലാ സീതാരാമൻ ലോക്സഭയിൽ പ്രഖ്യാപിച്ചു.
50 പുതിയ എയർപോർട്ടുകൾ, ഹെലിപാഡുകൾ, വാട്ടർ-എയ്റോ ഡ്രോണുകൾ, നൂതനമായ ലാൻഡിംഗ് ഗ്രൗണ്ടുകൾ എന്നിവ നിലവിൽ വരുമെന്ന് ധനമന്ത്രി അറിയിച്ചു. കൂടാതെ സ്ത്രീകൾക്കും മുതിർന്ന പൗരന്മാർക്കും സേവിംഗ്സ് പദ്ധതിയും ധനമന്ത്രി പ്രഖ്യാപിച്ചു. രണ്ട് വർഷക്കാലയളവുള്ള ‘മഹിളാ സമ്മാൻ സേവിംഗ് സർട്ടിഫിക്കറ്റ്’ അവതരിപ്പിക്കും. 7.5 ശതനമാനം പലിശനിരക്കോടെ രണ്ട് ലക്ഷം രൂപ നിക്ഷേപിക്കാൻ കഴിയുന്നതാണ് പദ്ധതി. ഇതുപ്രകാരം നിക്ഷേപത്തിന്റെ പകുതി തുക എപ്പോൾ വേണമെങ്കിലും പിൻവലിക്കാവുന്നതാകും രീതി.
അതേസമയം ബജറ്റ് പ്രഖ്യാപനത്തിന്റെ പശ്ചാത്തലത്തിൽ ഓഹരി വിപണിയിൽ കുതിപ്പ് നേരിട്ടതായാണ് റിപ്പോർട്ട്. സെൻസെക്സും നിഫ്റ്റിയും നേട്ടത്തോടെയാണ് വ്യാപാരം തുടങ്ങിയത്. രൂപയുടെ മൂല്യത്തിലും വർധനവുണ്ടായെന്നാണ് റിപ്പോർട്ട്.
