ഏറ്റവും നിശബ്ദമായ മുറിയിൽ ഇരിക്കണമെന്നുണ്ടോ.. നിശബ്ദതയെ ആസ്വദിക്കാൻ ഇഷ്ടപ്പെടുന്ന ഏതൊരാൾക്കും അത്തരമൊരു മുറിയിലേക്ക് പോകണമെന്നുണ്ടാകും. അവിടെ അൽപ നേരം ചിലവഴിക്കണമെന്നുണ്ടാകും. എന്നാൽ പൂർണമായും നിശബ്ദത നിറഞ്ഞ മുറിയിൽ ഒരു മണിക്കൂറിൽ കൂടുതൽ നേരം ചിലവഴിക്കാൻ കഴിയില്ലെന്നാണ് പറയുന്നത്. വാഷിങ്ടണിൽ സ്ഥിതിചെയ്യുന്ന ലോകത്തിലെ ഏറ്റവും നിശബ്ദമായ മുറിയെക്കുറിച്ചാണ് ഈ പറഞ്ഞുവരുന്നത്.
2015ൽ മൈക്രോസോഫ്റ്റാണ് ലോകത്തിലെ ഏറ്റവും നിശബ്ദമായ മുറി പണിതുണ്ടാക്കിയത്. നിശബ്ദതയുടെ കാര്യത്തിൽ ഈ മുറിയെ വെല്ലാൻ മറ്റൊരു സ്ഥലത്തിനും സാധിക്കില്ലെന്നതിനാൽ ഗിന്നസ് റെക്കോർഡിൽ ഇടം പിടിക്കാനും ഈ സവിശേഷ മുറിക്ക് സാധിച്ചിട്ടുണ്ട്.
വാഷിങ്ടണിലുള്ള റെഡ്മോണ്ടിൽ സ്ഥിതിചെയ്യുന്ന മൈക്രോസോഫ്റ്റിന്റെ ആസ്ഥാന കെട്ടിടത്തിനുള്ളിലാണ് റെക്കോർഡ് സൃഷ്ടിച്ച ഈ മുറിയുള്ളത്. അനീക്കോയിക്ക് ചാംബർ എന്നാണ് മുറിയുടെ പേര്. അനീക്കോയിക് എന്നാൽ എക്കോ (പ്രതിധ്വനി) ഇല്ലാത്തത് എന്നാണ് അർത്ഥം. ഏകദേശം രണ്ട് വർഷത്തോളം സമയമെടുത്ത് രൂപകൽപന ചെയ്ത മുറിയാണിതെന്ന് പറയപ്പെടുന്നു.
മനുഷ്യന്റെ കേൾവിശക്തിയുടെ പ്രത്യേകതയനുസരിച്ച് 20 ഡെസിബലിന് താഴെയുള്ള ശബ്ദങ്ങൾ തിരിച്ചറിയാൻ പ്രയാസമാണ്. എന്നാൽ ഈ മുറിയിലേക്ക് വന്നാൽ അത്തരം ശബ്ദങ്ങൾ കേൾക്കാൻ കഴിയുമെന്നാണ് പറയുന്നത്. രണ്ട് അൾട്രാ സെൻസെറ്റീവ് ടെസ്റ്റുകൾ നടത്തിയതിന് ശേഷമാണ് മുറിക്ക് റെക്കോർഡ് നൽകിയതെന്ന് ഗിന്നസ് അധികൃതരും ചൂണ്ടിക്കാട്ടുന്നു.
ഈ മുറിയിൽ അൽപ നേരം ഇരുന്നുകഴിഞ്ഞാൽ സ്വന്തം ഹൃദയമിടിപ്പ് പോലും കേൾക്കാൻ കഴിയുമെന്നാണ് നിർമാതാക്കൾ അവകാശപ്പെടുന്നത്. ഹൃദയമിടിപ്പ് കേട്ടതിന് ശേഷം കുറച്ചുനേരം കൂടി മുറിയിൽ തുടരുകയാണെങ്കിൽ സ്വന്തം ശരീരത്തിലൂടെ രക്തമൊഴുകുന്നതിന്റെ ശബ്ദം കേൾക്കാൻ തുടങ്ങും. ശ്വാസിക്കുന്നതും നിശ്വസിക്കുന്നതും വളരെ ഉച്ചത്തിൽ കേൾക്കാം. എന്നാൽ സവിശേഷമായി തയ്യാറാക്കിയ ഈ മുറിയിൽ ഒരുപരിധിയിൽ കൂടുതൽ നേരം ചിലവഴിക്കാൻ സാധിക്കില്ലെന്നാണ് പറയുന്നത്. നിശബ്ദത മൂലം കുഞ്ഞു ശബ്ദങ്ങൾ വരെ കേൾക്കാൻ പറ്റുന്നതിനാൽ കുറച്ചുകഴിഞ്ഞാൽ ശരീരത്തിന്റെ സമതുലിതാവസ്ഥയും പരിസരബോധവും നഷ്ടപ്പെടാൻ സാധ്യതയുണ്ടെന്ന് നിർമാതാക്കൾ വ്യക്തമാക്കുന്നു.
Comments