സുവ: ഇന്ത്യയുടെ സഹകരണത്തിന് നന്ദി പറഞ്ഞ് ഫിജിയൻ പ്രധാനമന്ത്രി സിതിവേനി റബുക്ക. കേന്ദ്ര വിദേശകാര്യ മന്ത്രി എസ് ജയശങ്കറുമായുള്ള കൂടിക്കാഴ്ചയിലാണ് ഫിജിയൻ പ്രധാനമന്ത്രി ഇന്ത്യയ്ക്ക് നന്ദി പറഞ്ഞത്. ‘ഈ സുപ്രധാന സഹകരണം സാക്ഷാത്കരിച്ചതിന് ഫിജി സർക്കാരിന്റെ പേരിൽ അദ്ദേഹം ഇന്ത്യൻ സർക്കാരിന് നന്ദി പറഞ്ഞു. ഇന്ത്യാ-ഫിജി സഹകരണം വർദ്ധിപ്പിക്കുന്നതിലൂടെ നിരവധി സംരംഭങ്ങൾക്ക് ഇനി സാക്ഷ്യം വഹിക്കുമെന്ന് ഉറപ്പുണ്ടെന്നും ഫിജിയൻ പ്രധാനമന്ത്രി വ്യക്തമാക്കി.
അതേസമയം കൂടിക്കാഴ്ചയിൽ ചൈനയെക്കുറിച്ച് എന്തെങ്കിലും ചർച്ച ചെയ്തിരുന്നോ എന്ന് ഒരു മാദ്ധ്യമപ്രവർത്തകന്റെ ചോദ്യത്തിന് രസകരമായ മറുപടിയാണ് ഫിജിയൻ പ്രധാനമന്ത്രി നൽകിയത്. ഇന്ത്യയുടെ വിദേശകാര്യ മന്ത്രി പസഫിക് ദ്വീപ് രാഷ്ട്രമായ ഫിജി സന്ദർശിക്കുന്ന സമയത്ത് ഇവിടെ ഇല്ലാത്ത ഒരാളെ കുറിച്ച് സംസാരിക്കുന്നത് മോശം പെരുമാറ്റമാണെന്ന് കരുതിയെന്നും വലിയ ശക്തിയുള്ള, സമ്പദ് വ്യവസ്ഥയുള്ള ഇന്ത്യയെ പ്രധാന സുഹൃത്തായി കാണുന്നുവെന്നും അതുകൊണ്ട് ഞങ്ങളുടെ സഹകരണത്തെ കുറിച്ച് മാത്രമാണ് സംസാരിച്ചതെന്നുമാണ് ഫിജിയൻ പ്രധാനമന്ത്രി സിതിവേനി റബുക്ക മറുപടി പറഞ്ഞത്.
