ന്യൂഡൽഹി: ഓസിസ് താരങ്ങളെ പ്രതിസന്ധിയിലാക്കി ഇന്ത്യൻ താരം രവിചന്ദ്രൻ അശ്വിൻ. ബോർഡർ ഗവാസ്‌കർ പരമ്പരയിലെ രണ്ടാം മത്സരത്തിൽ നിലവിൽ ഓസ്ട്രേലിയയുടെ 3 വിക്കറ്റുകൾ താരം വീഴ്‌ത്തി കഴിഞ്ഞു. ഇതിനോടൊപ്പം ടെസ്റ്റ് മത്സരത്തിൽ ഓസ്ട്രേലിയക്കെതിരെ 100 വിക്കറ്റുകൾ വീഴ്‌ത്തുന്ന രണ്ടാമത്തെ താരമായി മാറുകാണ് ഇന്ത്യയുടെ ഓഫ് സ്പിന്നർ രവിചന്ദ്രൻ അശ്വിൻ.
ന്യൂഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ നടക്കുന്ന രണ്ടാം ടെസ്റ്റ് മത്സരത്തിന്റെ ആദ്യ ദിനത്തിൽ തന്നെ ഓസിസ് താരങ്ങൾക്ക് ഭീഷണിയാകുകയാണ് താരം. ഓസ്ട്രേലിയൻ താരങ്ങളായ മാർനസ് ലബുഷാഗ്നെ, സ്റ്റീവ് സ്മിത്ത്, അലക്‌സ് കാരി എന്നിവരെ പുറത്താക്കിയാണ് തന്റെ 100-ാം ടെസ്റ്റ് വിക്കറ്റ് എന്ന നേട്ടത്തിലേക്ക് അശ്വിൻ എത്തിയത്. ഒരേ ഓവറിൽ ലബുഷാഗ്നെയെയും സ്മിത്തിനെയും പുറത്താക്കിയ അശ്വിൻ ഉച്ചഭക്ഷണ ഇടവേളയ്‌ക്ക് മുമ്പ് ഓസ്ട്രേലിയയെ പ്രതിസന്ധിയിലാക്കി.
ഓസ്ട്രേലിയക്കെതിരെ ടെസ്റ്റ് മത്സരത്തിൽ 100 വിക്കറ്റുകൾ ആദ്യമായി നേടുന്നത് ഇന്ത്യൻ ഇതിഹാസമായ അനിൽ കുംബ്ലെയാണ്. 111 വിക്കറ്റുകളാണ് അനിൽ കുംബ്ല നേടിയത്. എന്നാൽ ബോർഡർ ഗവാസ്‌കർ പരമ്പരയുടെ ആദ്യമത്സരത്തിൽ ടെസ്റ്റ് ക്രിക്കറ്റിലെ മികച്ച രണ്ടാമത്തെ ബോളറായി അശ്വിൻ തിരഞ്ഞെടുക്കപ്പെട്ടിരുന്നു. നിലവിൽ പരമ്പരയുടെ രണ്ടാം മത്സരവും ഇന്ത്യയ്‌ക്ക് ആവേശകരമായ തുടക്കമാണ്.
